Қашқадарё вилояти Муборак туманидаги корхоналардан бирининг раҳбар ўринбосари 319,7 миллион сўмни талон-торож қилгани аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Муборак туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Текширув давомида «М-С.» МЧЖ раҳбари ўринбосари Б.И. ва бошқалар олдиндан тил бириктириб, 2021 йилнинг март—октябрь ойларида корхонанинг 319,7 миллион сўм пул маблағини банк пластик картасига ўтказиб, ўзларининг манфаатлари йўлида талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Сурхондарёда ширкат раҳбари таъмирлаш ва қурилиш ишлари учун ажратилган пулдан 525,2 млн сўмни ўзлаштиргани, Навоийда аҳоли учун ажратилган 722 тонна кўмирни ўзлаштирган омбор мудири ушлангани, Сурхондарёда омонатга қўйилган 566 млн сўмни талон-торож қилган собиқ банк ходимига жиноят иши очилгани тўғрисида хабар берилганди.
Мавзуга доир:
Изоҳ (0)