Туркманистон президенти Гурбангули Бердимуҳамедов раислигида 26 ноябрь куни Давлат хавфсизлик кенгаши йиғилиши бўлиб ўтди, унда Ватан ҳимоячилари кунига (27 январда нишонланади) тайёргарлик масалалари муҳокама қилинди. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
Фото: Turkmenistan.gov.тм
Хабарга кўра, йиғилишда ҳуқуқ-тартибот идоралари раҳбарлари режалаштирилган байрам тадбирлари юзасидан ҳисобот берган.
Ўз навбатида, Бердимуҳамедов ҳарбий ва ҳуқуқ-тартибот идоралари ходимларидан тузилган «Turkman edermen» («Мард туркман») махсус мақсадли гуруҳлар фаолиятини такомиллаштириш бўйича кўрсатмалар берган.
«Махсус кучлар аскарлари юксак жанговар тайёргарлиги билан ажралиб туриши, мардлик, ватанпарварлик каби фазилатларга эга бўлиши, зиммасига юклатилган вазифаларни бажаришга масъулият билан ёндашиши зарур. Гуруҳлар шахсий таркибининг касбий маҳорати, назарий билими ва жисмоний тайёргарлиги тизимли равишда ошириб борилиши керак», – деди Туркманистон президенти ҳамда бу борада аниқ топшириқлар берди.
Ватан ҳимоячилари куни ҳақида гап кетганда Бердимуҳамедов, «байрам ҳар бир ҳарбий хизматчи учун унутилмас бўлиши ва уларнинг хотирасида муҳим воқеа сифатида қолиши керак»лигини таъкидлаган. Туркманистон раҳбари, шунингдек, алоҳида хизмат кўрсатган ҳарбий хизматчиларни тақдирлаш бўйича таклифлар тайёрлашни буюрган.
Туркманистонда «Turkman edermen» медали ва унвони 2019 йил декабрь ойида таъсис этилган. Ушбу медал давлат мукофоти бўлиб, ҳарбий хизматчилар ва ҳуқуқ-тартибот органлари ходимларига мамлакатни муҳофаза қилиш, қонун устуворлиги ва ҳуқуқ-тартиботни таъминлаш, ўта муҳим ва мураккаб топшириқларни бажаришда кўрсатган шахсий жасорати, шунингдек, ҳаёт учун хавфли шароитларда хизмат вазифаларини бажаришдаги алоҳида хизматлари учун учун берилади. Медал соҳибларига энг кам иш ҳақининг уч баравари миқдорида бир марталик мукофот ҳам тўланади.
28 сентябрь куни Туркманистон парламенти мамлакат мустақиллигининг 30 йиллиги шарафига Гурбангули Бердимуҳаммедовни ушбу медал билан тақдирлади, чунки «президент ҳарбий техника, жумладан, ўта мураккаб ҳарбий самолётларни бошқаришда мукаммал қобилияти, юксак маҳорати ва жасорати билан намуна бўлмоқда», — дейилади хабарда.
Аввалроқ Гурбангули Бердимуҳамедов Ашхобод яқинидаги туманлардан бирига сафари чоғида ўзининг тўппончадан ўқ узиш маҳоратини намойиш этганди.
«Ўқ отиш майдонида давлат раҳбари нишонга бир неча бор ўқ узди ва барча ўқлар нишон марказига тегди, бу миллат етакчисининг юксак маҳоратидан далолатдир», — дейилади хабарда.
Анъанага кўра, Бердимуҳамедов нишонга дастхат қолдирган.
