Қашқадарё вилоятининг Чироқчи туманида ЙПХ инспектори ва вилоят ИИБга қарашли тезкор вазифаларни бажарувчи сафарбарлик отряди вакиллари фуқаро бошқарувидаги автомобиль ойналарини синдиришга уринди. Бу ҳақда «Дарё»га автоблогер Мақсуд Музаффаров маълум қилди.

Фото: Видеодан кадр

Қайд этилишича, воқеа 27 ноябрь куни Чироқчи тумани марказидаги туман Йўл ҳаракати хавфсизлиги бўлими маъмурий биноси ёнида содир бўлган.

«ЙПХ ходимлари томонидан тўхтатилган Lacetti 100 фоиз тонировка экан. ЙПХ ходимлари автомобиль ҳужжатларини текширмоқчи бўлган шекилли, тўхтатган. Аммо ҳайдовчи автомобиль эшикларини ёпиб, ЙПХ ходимларига бўйсунмаган. Кейин эса воқеа жойидан кетишга чоғланди», — дейди Мақсуд Музаффаров.

Қашқадарёлик автоблогернинг «Дарё»га тақдим этган видеосидан англашилишича, воқеа жойидан кетишга чоғланган Lacetti ҳайдовчиси ЙПХ инспекторлари ва вилоят ИИБга қарашли тезкор вазифаларни бажарувчи сафарбарлик отряди вакиллари қаршилигига дуч келган.

«Энг қизиғи аввалига ЙПХ инспекторларидан бири, кейин эса қора махсус формали кишилар фуқаро автомобилининг ойналарини синдиришга уринди», — дейди автоблогер.

Қўшимча қилинишича, Lacetti ҳайдовчисини воқеа жойини тарк этишга ундаб, «кет бу ердан» дея бақирган фуқаролардан бири ЙПХ инспекторлари ва вилоят ИИБга қарашли тезкор вазифаларни бажарувчи сафарбарлик отряди вакиллари томонидан мажбурий тарзда олиб кетилган.

Видеода автомобилнинг орқа ойнаси дубинка зарбидан синганини кўриш мумкин.

Ҳолатга ЙҲХББ матбуот хизмати муносабат билдириб, айни кунларда Қашқадарё вилоятида «Хавфсиз ҳудуд» кенг қамровли профилактик тадбири доирасида йўлларда соҳавий хизматлар ходимлари ҳамкорлигида рейдлар ўтказилаётганини маълум қилди.

Қашқадарё вилояти ИИБ матбуот хизмати маълумотларига кўра, ушбу тадбирлар 19 ноябрь куни тасдиқланган режага асосан вилоят ИИБ ЙҲХБ, вилоят ИИБ Тезкор вазифаларни бажарувчи сафарбарлик отряди ходимлари ҳамда вилоят транспорт бошқармаси ходимлари билан ҳамкорликда вилоят ҳудудида автотранспорт воситалари ҳайдовчилари томонидан йўл қўйилаётган қўпол қоидабузарликларни аниқлаш, йўл-транспорт ҳодисаларни олдини олиш мақсадида ўтказилмоқда.

27 ноябрь куни соат 16:10 ларда ўтказилган тадбир давомида Қашқадарё вилояти, Чироқчи тумани, «Коммуна» МФЙ ҳудудидан ўтган ички йўлда ЙПХ ходимлари томонидан Lacetti тўхтатилганида, ҳайдовчи қонуний талабни бажармасдан автомобилнинг ойнаси ва эшикларини қулфлаб олдинда турган соҳа вакилларининг устига транспортни бошқарган.

Мазкур жараёнда ходимлар томонидан махсус воситалар қўлланилиб, ҳайдовчини тўхтатиш чоралари кўрилганлигига қарамасдан ҳайдовчи воқеа жойидан қочиб кетган. Ҳозирда ЙПХ ходимининг билдиргиси асосида бўйсунмай ҳаракатланган ҳайдовчи юзасидан суриштирув олиб борилмоқда.