Ижтимоий тармоқда 120 метр масофа ичида 20 та пиёдалар ўтиш жойи белгиси ўрнатилгани акс этган видео тарқалди. ЙҲХББ матбуот хизмати расмий маълумот бериб, ҳолат Тошкент вилоятининг Чиноз туманидаги ички йўлда юз берганини маълум қилди.
«Мазкур йўл қурилишида белгиларни ўрнатиш ишлари Тошкент вилояти ИИББ ЙҲХБ масъуллари билан келишилмагани, бунинг натижасида белгилар нотўғри ўрнатилгани маълум бўлди. Ушбу хатолик бартараф этилиб, амалдаги тартибга кўра йўлни белги ва чизиқлар билан жиҳозлаш ишлари амалга оширилмоқда», — дейилади хабарда.
Шунингдек, жуда қисқа масофаларда, белгиланмаган жойларга нотўғри ўрнатилган 5.16.1, 5.16.2. пиёдалар ўтиш жойи белгилари олиб ташлангани акс этган сурат илова қилинган.
Аввалроқ ижтимоий тармоқларда Тошкент кўчаларида янги йўл белгиси пайдо бўлгани ҳақида хабарлар тарқалганди. Кейинроқ ЙҲХББ ҳолатга муносабат билдириб, ушбу белги ГОСТ 23457-86 талаблари, шунингдек, Вазирлар Маҳкамасининг 2015 йил 24 декабрдаги «Йўл ҳаракати қоидаларини тасдиқлаш» тўғрисидаги 370-сонли қарорида ҳам мавжуд эмаслигини таъкидлаган.
Изоҳ (0)