Ўзбекча матнни ўқиб берувчи биринчи ўзбек нутқ синтезатори яратилди. Бу ҳақда Тошкент шаҳрида 22—27 ноябрь кунлари бўлиб ўтган «Innoweek.uz-2021» халқаро инновацион ғоялар ҳафталигида намойиш этилди, дея хабар бермоқда «Дарё» мухбири.
Ғоя муаллифи, филология фанлари доктори Мунаввара Қурбонованинг маълум қилишича, дастур кўзи ожизларга ўзбекча матн билан ишлашда қулайлик яратиш мақсадида яратилган.
«Мактаб ва олий таълимдаги ўқиш жараёнида ўзбек нутқ синтезатори йўқлиги боис ўзим кўп муаммога дуч келганман. Одатда китобларни уйдагилар ўқиб беришарди. Кўп бадиий китобларни аудио вариантлари бор, лекин ўқув қўлланмаларни аудио ёки кўзи ожизларга мўлжаллаб чоп этилган вариантлари деярли йўқ ҳисоби. Баъзи илмий китобларни Брайл алифбосида чоп этиладиган бўлса, жуда кўп ресурс керак. Бунинг устига ҳажми ҳам йирик бўлиб кетади. Тўғри, рус ва инглиз тилларида синтезатор дастурлари бор. Аммо бошқа тилда яратилган дастур матнни ўз тилидаги қонуниятларга мослаб ифодалаб беради ва ўзбекча сўзларни нотўғри талаффуз қилади. Натижада инсон матнни диққат билан эшитишга мажбур бўлади ва мия зўриқади. Шуларни ҳисобга олиб, ўзбек нутқ синтезаторини яратишга киришдим», — деди Мунаввара Қурбонова.
Таъкидланишича, дастурни яратишда сунъий интеллект технологияси асосида ўзбек нутқ синтезатори ишлаб чиқилган.
«Бунинг учун Ўзбекистонда биринчи марта сунъий овоз яратилди. Иккинчи босқичда эса дастурий маҳсулот ишлаб чиқилди. Дастурга ўн мингдан ортиқ сўз киритилган. Албатта, дастур тўкис эмас, камчиликлари ҳам бор. Ўзлашма сўзлар билан боғлиқ масалалар турибди. Техник жиҳатдан ҳам тўлдирилиши керак бўлган ўринлар мавжуд. Ҳозирда ушбу камчиликларни бартараф этиш устида иш олиб боряпмиз», — деди ғоя муаллифи.
Лойиҳа Инновацион ривожланиш вазирлиги томонидан ажратилган 300 миллион сўм грант маблағлари асосида уч йил давомида яратилган.
Изоҳ (0)