26 ноябрь куни президент Шавкат Мирзиёев Қозоғистоннинг биринчи президенти Нурсултон Назарбоев билан телефон орқали мулоқот қилди. Бу ҳақда давлат раҳбарининг матбуот хизмати хабар берди.
Суҳбат аввалида Ўзбекистон президенти Нурсултон Назарбоевни яқинлашиб келаётган байрам — Қозоғистоннинг биринчи президенти куни билан табриклаб, мустаҳкам соғлик, фаровонлик ва янги зафарлар, биродар Қозоғистон халқига бардавом тараққиёт ва равнақ тилаган.
Нурсултон Назарбоевнинг замонавий Қозоғистонни барпо этиш, мамлакатнинг халқаро майдондаги нуфузини юксалтиришдаги тарихий ўрни ва улкан шахсий ҳиссаси қайд этилган.
Икки мамлакат ўртасидаги дўстлик, яхши қўшничилик ва стратегик шериклик муносабатлари бугун юксак даражага кўтарилгани мамнуният билан таъкидланган.
«2021 йил бошидан ўзаро товар айирбошлаш ҳажми 40 фоизга ошди, икки мамлакатнинг етакчи компания ва корхоналари ўртасидаги саноат кооперацияси кенгайиб бормоқда. Бугун Туркистон шаҳрида Ўзбекистон ва Қозоғистон ҳукуматлари раҳбарлари иштирокида ҳукуматлараро комиссиянинг навбатдаги йиғилиши ва ҳудудлар форуми ўтказилмоқда», — дейилади хабарда.
Бундан ташқари, маданий-гуманитар алмашинувга доир муҳим дастурларни амалга ошириш фаол давом эттирилмоқда.
Телефон мулоқоти чоғида икки томонлама ва минтақавий ҳамкорликнинг долзарб масалалари юзасидан фикр алмашилган, бўлажак олий даражадаги учрашувлар режаси кўриб чиқилган.
Эслатиб ўтамиз, Нурсултон Назарбоев 2019 йил 19 март куни президентлик лавозимидан кетиши ҳақида эълон қилган ва эртаси куни давлат раҳбари сифатида ўз ваколатларидан воз кечиши ҳақидаги фармонни имзолаган. Аввалроқ Назарбоев умуртқасини операция қилдиргани Қозоғистон президенти лавозимидан кетишининг сабабларидан бири эканини тан олганди.
Изоҳ (0)