Давлат хавфсизлик хизмати Олмазор туман ҳокимлиги мансабдорини пора олаётганида қўлга олди. У 12 гектар ерни 1,5 миллион доллар эвазига олиб бермоқчи бўлган.
Маълум бўлишича, Тошкент шаҳар Олмазор тумани ҳокимлигининг мансабдор шахсларидан бири ноқонуний даромад олиш мақсадида, 1978 ва 1980 йилларда туғилган икки нафар фуқаро билан келишган ҳолда, тадбиркорлик билан шуғулланмоқчи бўлган шахснинг ишончига кирган.
Унга пластик трубалар ишлаб чиқарувчи завод қуриши учун юқори лавозимда ишловчи танишлари орқали Тошкент вилоятининг Зангиота тумани ҳудудидан 12 гектар ер майдони олиб бериш эвазига 1 миллион 560 минг доллар талаб қилган.
ДХХнинг Тошкент вилояти бўйича бошқармаси ходимларининг вилоят прокуратураси ҳамда иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказган тезкор тадбири давомида, улар Тошкент шаҳридаги ресторанлардан бирида аванс сифатида 50 минг долларни олган вақтларида ашёвий далиллар билан ушланган.
Аввалроқ Тошкентда ерни ноқонуний олиб бермоқчи бўлган хонанда ДХХ томонидан қўлга олингани, Наманганда туман солиқ инспекцияси бошлиғи 15 минг доллар, Хоразм вилояти Фавқулодда вазиятлар бошқармаси ходими 30 минг доллар пора олаётганида ушлангани ҳақида хабар берилган эди.
Мавзуга доир:
- Юнусобод тумани давлат солиқ инспекцияси катта инспектори 3,5 минг доллар пора билан ушланди
- Тошкентда 352 минг долларга ер сотмоқчи бўлган туман ҳокимлиги мансабдори ушланди (видео)
- Чилонзор туман ҳокимлиги бўлим бошлиғи 50 минг доллар пора билан ушланди
- Юнусобод тумани ҳокимининг қурилиш ишлари бўйича ўринбосари 5 минг доллар пора билан қўлга тушди
Изоҳ (0)