Плей-оффга йўлланма олган «Рома», «Манчестер Юнайтед»да иш бошлайдиган немис мураббийи, Globe Soccer Awards совринига даъвогар футболчи ва мураббийлар. Энг сўнгги спорт янгиликлари

Дунё ва ўзбек спортига оид 26 ноябрь тонгининг энг муҳим хабарлари дайжести билан танишинг.

Ўзбекистон

Суперлиганинг сўнгги туридан ўрин олган учрашувлар 27 ноябрь, шанба куни бўлиб ўтади. ПФЛ мазкур учрашувларга бириктирилган ҳакамлар рўйхатини маълум қилди. Унга кўра, «ОКМК» — «Сўғдиёна» ва «Насаф» — «Локомотив» ўйинларида VAR тизими ишлайди.

«Сурхон» — «Машъал» учрашувида эса дарвозалар ортидаги ҳакамлар фаолият юритади.

Жаҳон

Педру Гонсалвеш («Спортинг») Чемпионлар Лигасида ҳафтанинг энг яхши ўйинчиси деб топилди. 23 ёшли футболчи «Боруссия Д»га қарши баҳсда (3:1) дубль ва битта голли узатма қайд этганди.

Шунингдек, қуйидаги ўйинчилар мазкур ном учун кураш олиб борганди:

• Эдин Жеко («Интер») — «Шахтёр»га қарши беллашувда (2:0) иккита гол;
• Себастьян Аллер («Аякс») — «Бешиктош»га қарши ўйинда (2:1) дубль;
• Эмиль Форсберг («Лейпциг») — «Брюгге»га қарши учрашувда (5:0) 2 та гол.

«Рома» Конференциялар Лигаси плей-офф йўлланмасига эга чиқди, «Тоттенҳэм» гуруҳда қолиб кетиши мумкин

25 ноябрь куни Европа Лигаси ва Конференциялар Лигаси 5-туридан ўрин олган учрашувлар бўлиб ўтди. «Рома» ўз уйида «Заря»ни йирик ҳисобда мағлуб этиб (4:0), муддатидан аввал кейинги босқич масаласини ҳал қилди. «Тоттенҳэм» эса ҳакам томонидан қўшиб берилган вақтда гол ўтказиб, мағлубиятга учради (1:2). Шу тариқа Антонио Конте қўл остида илк мағлубиятини қабул қилиб олган «шпорлар» қийин вазиятда қолди. Сўнгги турда лондонликлар гуруҳ пешқадами «Ренн»ни енгиши ва «Витесс»нинг очко йўқотишини кутишга мажбур.

Еврокубоклар баҳорида Украина клублари бўлмайди

«Заря» «Рома»га енгилган ҳолда гуруҳда қолиб кетди. Шу тариқа Украинанинг учинчи клуби ҳам Еврокубоклар плей-офф босқичидан қуруқ қолди. Аввалроқ «Динамо Киев» ва «Шахтёр» Чемпионлар Лигаси 1/8 финалига чиқиш имкониятини йўқотганди.

Кетма-кет тўртинчи мавсум Чемпионлар Лигаси 1/8 финалида Украина клуби ўйнамайдиган бўлди. шунингдек, 2007/08 йилги мавсумдан кейин илк бор Европа Лигаси плей-офф босқичида украин клуби бўлмайди.

Ралф Рангник «Манчестер Юнайтед» бош мураббийига айланади

Москванинг «Локомотив» клуби спорт ва ривожланиш бўйича раҳбари Ралф Рангник фаолиятини АПЛда давом эттириши мумкин.

The Athletic хабарига кўра, 63 ёшли мутахассис «Манчестер Юнайтед»ни бошқаришга розилик берган. Томонлар 6 ойлик шартнома имзолайди. Кейин эса мутахассис «Юнайтед» билан яна 2 йиллик битим имзолаб, маслаҳатчи сифатида фаолият юритади.

Manchester Evening News’га кўра, Рангник аввалига манкунианлар таклифини рад этган, бироқ яхшиланган иккинчи таклифдан кейин розилик берган.

Айни вақтда Ралф Англияда бўлиб турибди ва клуб билан шартнома имзолашга яқин. Москваликлар 26 ноябрь куни унинг кетганини расман эълон қилади, дея хабар қилмоқда «Чемпионат».

Ралф Рангник «Лейпциг»даги фаолияти орқали футбол оламига танилган.

Globe Soccer Awards—2021 совринига даъвогар футболчи ва мураббийлар рўйхати эълон қилинди

• Энг яхши мураббий номига даъвогарлар: Антонио Конте («Тоттенҳэм»), Льюис Кортес («Барселона» аёллар жамоаси собиқ устози), Дидье Дешам (Франция), Унаи Эмери («Вильярреал»), Ханс-Дитер Флик (Германия), Кристоф Гальтье («Ницца»), Пеп Гвардиола («Манчестер Сити»), Каспер Юлманд (Дания), Роберто Манчини (Италия), Лионель Скалони (Аргентина), Диего Симеоне («Атлетико»), Гарет Саутгейт (Англия), Тите (Бразилия) ва Томас Тухель («Челси»).
• Энг яхши футболчи бўлишга номзодлар: Жанлуижи Доннарумма, Маркиньос, Неймар, Киллиан Мбаппе, Марко Верратти, Лионель Месси (барчаси – «ПСЖ»), Сесар Аспиликуэта, Жоржиньо, Нголо Канте, Ромелу Лукаку (барчаси – «Челси»), Йозуа Киммих, Томас Мюллер, Роберт Левандовски (барчаси – «Бавария»), Бруну Фернандеш, Криштиану Роналду (иккиси – «Манчестер Юнайтед»), Кевин де Брюйне, Рубен Диаш (иккиси – «Манчестер Сити»), Карим Бензема («Реал»), Федерико Кьеза («Ювентус»), Эрлинг Ҳоланд («Боруссия Д»), Ҳарри Кейн («Тоттенҳэм»), Муҳаммад Салоҳ («Ливерпуль»).