«Манчестер Юнайтед» 21 ноябрь куни Оле-Гуннар Сульшерни истеъфога чиқарди. 48 ёшли мутахассис манкунианликларнинг собиқ юлдузи сифатида жамоага ташриф буюрганди. Аммо барчаси оғриқли ва шармандали якун топди: 25 сентябрдан кейин «Манчестер Юнайтед» АПЛдаги 7 ўйинда фақат бир маротаба ғалаба қозонди (5 та мағлубият, битта дуранг).

Энди барчаси бошидан бошланади — янги тарих, янги муваффақиятлар ва янги муаммолар. Ушбу саҳифада Сульшернинг «Манчестер Юнайтед»даги фаолиятини рақамларда кўриб чиқилади.

• Истеъфога чиққан кунини (2021 йил 21 ноябрь) ҳам ҳисобга олганда Сульшер 1068 кун мобайнида «Манчестер Юнайтед» бош мураббийи сифатида фаолият олиб борди. Умумий ҳисобда у жамоа билан 168 та ўйин ўтказди: 92 та ғалаба, 35 та дуранг ва 41 та мағлубият қайд этди.
• Оле-Гуннар Сульшернинг жамоадаги даври иккига бўлинади. Биринчиси — 99 кун мобайнида (2018 йил 19 декабрдан 2019 йил 28 мартга қадар) вақтинчалик бош мураббий бўлган. Иккинчиси — 969 кун (2019 йил 28 мартдан 2021 йил 20 ноябрга қадар) мобайнида жамоа бош мурабийи сифатида ишлаган.
• Сульшер қўл остида «қизил иблислар» 323 та гол урди ва 198 та гол ўтказиб юборди. «Манчестер Юнайтед»нинг энг йирик ғалабаси — 9:0 (2021 йил февраль ойида «Саутҳэмптон» устидан қозонилган). Йирик мағлубият — 1:6 (2020 йил октябрь ойида «Тоттенҳэм»дан қабул қилинган).

• Сульшер қўл остида манкунианликлар умуман соврин қўлга кирита олмади. 2020/21 йилги мавсум Европа Лигаси финалига қадар етиб борди. Аммо «Вильярреал» пенальтилар сериясида ғалабани илиб кетди — 11:10.
• Оле-Гуннар «Манчестер Юнайтед»нинг совринларсиз сериясини 4 йилга узайтирди. Аниқроқ қилиб айтганда, 1638 кун.
• Норвегиялик мутахассис даврида 16 нафар футболчи «Юнайтед» сафида АПЛда дебют қилди. Оле-Гуннар қўл остида энг кўп ўйин ўтказган футболчи — Маркус Рэшфорд. У барча мусобақаларда 135 та ўйинда майдонга тушди.
• Манкунианликлар Сульшер билан АПЛда 127 ўйинда 209 очко жамғарди. Бу қўлга киритиш мумкин бўлган натижанинг 54,85% қисми.
• Норвегиялик истеъфога чиқишидан аввал жамоа ўз майдонидаги кетма-кет 15 ўйинда гол ўтказиб юборди. «Қизил иблислар» тарихида фақатгина бир марта бундан ёмонроқ натижа қайд этилган: 1958 йилдан 1959 йилга қадар инглиз жамоаси кетма-кет 21 та уй учрашувида гол ўтказган.
• Сульшер қўл остидаги энг оғриқли мағлубият жорий мавсумда қабул қилиб олинди. Октябрь ойида «Ливерпуль» «Олд Траффорд»да мезбонлар дарвозасига жавобсиз 5 та гол урди. Жамоа АПЛ ўйинларида илк бор биринчи бўлимда 4 та гол ўтказиб юборди. Камига бу «Ливерпуль»дан учралган энг йирик мағлубият бўлди.

• Қайғули рақамларни келтиришда давом этамиз. «Манчестер Юнайтед» жорий мавсумда «Манчестер Сити»га 0:2 ҳисобида мағлуб бўлди. Манкунианликлар 2,5 йилдан сўнг илк бор Манчестер дербисида омадсизликка учради.
• Сульшер трансферлар учун 458 миллион евро сарфлади. Бу вақт давомида бирорта АПЛ жамоаси трансферлар учун бунча кўп пул сарфламаган. Энг қиммат трансфер — Ҳарри Магуайр. Англиялик ҳимоячи 87 миллион евро эвазига харид қилинган.
• Оле-Гуннар даврида «Манчестер Юнайтед» 138 миллион еврога футболчи сотган. Энг қиммат сотилган футболчи — Ромелу Лукаку. «Интер» бельгиялик ҳужумчи учун 74 миллион евро тўлаган.
• Сульшер билан «Манчестер Юнайтед» Премьер Лиганинг уй ўйинларида ўтказиб юборилган голлар бўйича антирекорд ўрнатди. 2019/20 йилги мавсумда жамоа 27 та гол ўтказиб юборган.
• Оле-Гуннар Сульшер Алекс Фергюсондан кейин «Манчестер Юнайтед»ни бошқарган бешинчи мураббий бўлди: Дэвид Моес, Райан Гиггз, Луи ван Гал ва Жозе Моуриньо норвегиялик мутахассисдан олдин жамоа мураббийи бўлган.
• Жорий мавсумда АПЛ жадвалининг кучли бешлигидан ўрин олган жамоалардан фақат биттаси Сульшер Англияда ишлаган вақтда соврин юта олмаган. «Челси» — Европа Лигаси, Чемпионлар Лигаси, УЕФА Суперкубоги; «Ливерпуль» — АПЛ, Чемпионлар Лигаси, УЕФА Суперкубоги; «Манчестер Сити» — АПЛ (икки марта), Англия Кубоги, Лига Кубоги (икки марта); «Арсенал» — Англия Кубоги ва Англия Суперкубогини қўлга киритган. Фақатгина «Вест Ҳэм» 3 йил мобайнида бирорта соврин юта олмади. Аммо «болғачилар» кучли бешликдан жой олганига кўп вақт бўлмади.