Саакашвилининг шифокори собиқ президентни даволашга психолог ва психиатр талаб этилишини маълум қилди

Грузия собиқ президенти Михаил Саакашвилининг шахсий шифокори Николоз Кипшидзе сиёсатчининг даволаниш жараёни учун психолог ва психиатр ёрдами керак бўлишини маълум қилди, деб хабар беради «Интерфакс».

«Мен психолог ва психиатрни жалб этиш зарур деб ҳисоблайман», — дейди Горидаги ҳарбий шифохонага кўчирилган Саакашвилини кўздан кечирган Кипшидзе.

Шунингдек, шифокор Саакашвилининг аҳволини баҳолаш учун хориждан мутахассислар жалб этиш зарурлигини ҳам истисно этмаган.

«Ҳозирча хавф мавжуд, барчаси ортда қолди ва яхши дея олмайман. Нима бўлишини кузатиш ва кўриш керак… Даволаниш давом эттирилмоқда, умумий ҳолсизлик, бош оғриғи кузатиляпти, қон босими ўйнаяпти», — дейди Кипшидзе.

Бундан ташқари, у очлик тўхтатилганидан кейинги қайта тиклаш жараёнининг биринчи куни яхши ўтганини таъкидлаган, бироқ шифокорлар неврологиядан хавотирда ва яқин кунларда неврологларнинг келиши режалаштирилмоқда.

«Биласизки, бу каби беморларда маълум ва жуда мураккаб даволаш ҳамда реабилитация талаб этадиган посттравматик синдром бўлади», — дейди Кипшидзе.

Унинг таъкидлашича, Саакашвили госпиталда ўзини қамоқхона шифохонасидан кўра хотиржамроқ ҳис қилмоқда, госпитал шифокорларидан миннатдор, госпитал ва қамоқхона шифохонаси ўртасидаги фарқ катта деб ҳисоблайди.

Кипшидзенинг сўзларига кўра, палатада ягона муаммо дераза бўлган. Саакашвили палатага қуёш нури тушиб туришини ва дераза бир сантиметрга бўлса ҳам, очилишини талаб қилган. Натижада муаммо бартараф этилган.

19 ноябрь куни 49 кундан бери очлик сақлаб келаётган Саакашвили адвокати билан учрашув вақтида йиқилиб тушиб, ҳушидан кетгани ҳақида хабар берилганди. Йиқилгач, у кўзини очмаган ва ҳеч нарсани сезмаган. Саакашвилини «носилка»да олиб кетишган. У қамоқхона шифохонасининг жонлантириш бўлимига ётқизилган. Кейинроқ Саакашвили Гори шаҳридаги ҳарбий госпиталга кўчирилган.

Саакашвилининг шахсий шифокори Николоз Кипшидзе Грузия собиқ президентининг аҳволи кескин ёмонлашганини маълум қилган. Шифокорнинг сўзларига кўра, организмдаги эндокринологик ва метаболик ўзгаришлар натижасида юзага келган тери сарғайиши аввалги кунларга нисбатан кучайган. Доктор Кипшидзе яқин кунларда бу ўзгаришлар тузатиб бўлмас ҳолга келишидан хавотирда эди.