Байден тарафдорларига 2024 йилги президентлик сайловларида иштирок этмоқчилигини маълум қилди

АҚШ президенти Жо Байден ва унинг атрофидаги одамлар сўнгги пайтларда ўз тарафдорларини Байден президентлик учун иккинчи муддатга номзодини қўйишига ишонтирмоқда, дея хабар берди The Washington Post манбалари.

Газетанинг ёзишича, Демократлар партиясида Байденнинг рейтинги пасайгани ва ёши туфайли сайловда қатнашмаслиги ҳақидаги гап-сўзлар давом этмоқда — 2024 йилда у 81 ёшга тўлади.

WP нашрига кўра, Байден сайловларда иштирок этиш ниятини Демократлар партияси учун маблағ йиғиш тадбирида маълум қилган. Тадбирда иштирок этган Пенсильвания штатининг собиқ губернатори Эд Ренделлнинг айтишича, Жо Байден бирор нарсага «ўзи қаттиқ ишонсагина» гапиради. «У жисмоний ва ҳиссий жиҳатдан бажара олмаслигини тушунган ишининг ортидан югурмайди», — деб қўшимча қилди Ренделл.

Газета Демократлар партиясидан бўлган 28 нафар стратег ва расмий шахслардан интервью олиб, президентнинг ваъдаларига ҳамма ҳам ишонмаган деган хулосага келган. Айримларнинг фикрича, жорий режалар қандай бўлишидан қатъи назар, Байден ўз позициясининг пасайишига йўл қўймаслик учун сайловларда иштирок этиш режалари ҳақида гапириши фойдалидир. Шунингдек, нашр суҳбатдошларининг қайд этишича, 2024 йилги сайлов кампанияси графикка кўра янада қизғин бўлиши мумкин. 2020 йилда тадбирларнинг аксарияти масофавий форматда ўтказилганди. Шу билан бирга, WP Байден иккинчи муддатга номзодини қўйса, Демократлар партиясининг расмийлари уни қўллаб-қувватлашини қайд этмоқда. Президент ўз қарорини 2022 йилнинг ноябрида бўлиб ўтадиган Конгресс сайловларидан сўнг расман эълон қилиши кутилмоқда.

Аввалроқ Байденнинг рейтинги рекорд даражада пасайиб кетгани хабар қилинганди. Quinnipiac университети томонидан ўтказилган сўнгги сўровларга кўра, Байденнинг фаолиятини америкаликларнинг 36 фоизигина маъқуллайди. Бу янги тарихий минимум ҳисобланади. Бундан олдинги энг паст натижа октябрь ойида — сўров иштирокчиларининг 38 фоизини уни қўллаб-қувватланган вақтда қайд этилганди.