Профессионал бокс бўйича иккинчи ярим енгил вазн (-55,34 кг) тоифасида WBA ва IBF камарлари соҳиби Муроджон Аҳмадалиев (10-0, 7 КО) 20 ноябрь тонгида АҚШда навбатдаги жангини ўтказди.
Манчестерда (Ню-Гемпшир штати) бўлиб ўтган жангда Муроджон Аҳмадалиевга чилилик Хосе Веласкесга қарши рақиблик қилди. Тўлиқ раунд давом этган баҳсда Муроджон очколар ҳисобида (119-109) ғалаба қозониб, ўз камарларини ҳимоя қилди. Дастлабки 6 раунд давомида Аҳмадалиев устунликка эришган бўлса, 7-раундга келиб, Веласкес ҳам фаоллик кўрсатди ва бир қатор зарбалар йўллади. Охирги раундларда ҳар иккала жангчи ҳам устунликни ўз томонига оғдиришга ҳаракат қилди. Бироқ Муроджон Веласкесга нисбатан фаолроқ ҳаракат қилиб, ғалабани расмийлаштирди.
Эслатиб ўтамиз, Аҳмадалиев 2021 йилнинг апрель ойида бўлиб ўтган жангида япониялик Рёсуке Ивасани бешинчи раундда нокаутга учратиб, ўз камарларини ҳимоя қилганди.
Бунгача 26 ёшли боксчи 2020 йилнинг январида Даниэль Романни мағлуб этиб, бир йўла иккита чемпионлик камарига эга чиққанди.
Изоҳ (0)