18 ноябрь куни Бош прокуратурада кенгайтирилган ҳайъат йиғилиши бўлиб ўтди. Видеоселектор тарзида ўтказилган мажлисда прокуратура органларининг барча тезкор ходимлари, прокуратура фахрийлари ҳамда жамоатчилик кенгаши аъзолари иштирок этди, деб хабар беради идора матбуот хизмати.
Фото: Бош прокуратура матбуот хизмати
Бош прокурори Ниғматилла Йўлдошев иштирок этган ҳайъат йиғилишида мамлакатда қонунийликни таъминлаш, жиноятчилик ва ҳуқуқбузарликларнинг олдини олиш борасида йўл қўйилган хато ва камчиликлар ҳудудлар кесимида, аниқ рақам ва мисоллар асосида кўрсатиб берилган.
Йиғилишда прокуратура органларининг баъзи ходимлари томонидан содир этилган ножўя ва номуносиб хатти-ҳаракатлар, шу жумладан, коррупциявий ҳолатлар ҳамда буларга имкон берган сабаб ва шарт-шароитлар кескин танқид қилинган. Вилоят, туман (шаҳар) прокурорлари ва уларга тенглаштирилган прокурорларнинг, департамент ва бюро раҳбарларининг ҳисоботлари, тушунтириш ва изоҳлари эшитилган
Муҳокама натижасига кўра, фаолиятида жиддий хато ва камчиликларга йўл қўйган ҳамда хизмат вазифаларига совуққонлик билан муносабатда бўлган 18 нафар ходимларга интизомий жазо чоралари қўлланилган.
Фото: Бош прокуратура матбуот хизмати
Шу билан бирга, ходимлар масъулиятини тубдан ошириш, прокуратура ходими деган номга доғ тушурувчи ножўя хатти-ҳаракатлар содир этмасликлари ҳақида қатъий огоҳлантирилди. Йиғилишда кўрсатиб ўтилган хато ва камчиликларга йўл қўймаслик, ходимлар томонидан ўз хизмат бурчига масъулият, садоқат ва ҳалоллик билан ёндашишларини ҳамда ҳар қандай қонун бузилишига, айниқса, коррупция ҳолатларига қарши муросасиз курашишларини таъминлаш борасида зарур чора-тадбирлар белгиланди», — дейилади хабарда.
Ҳайъатда кўрилган масалалар юзасидан тегишли қарор қабул қилинган.
Аввалроқ Андижон прокуратураси ходими 15 минг доллар пора билан қўлга тушгани, Самарқандда мансабдор шахслар ва ҳуқуқни муҳофаза қилувчи орган ходимлари раҳбар бўлган жиноий гуруҳ аниқлангани тўғрисида хабар берилганди.
