Shavkat Mirziyoyev 17-noyabr kuni Qozog‘iston prezidenti Qosim-Jo‘mart To‘qayev bilan telefon orqali muloqot qildi, deb xabar bermoqda Prezident matbuot xizmati.

Foto: Prezident matbuot xizmati

Xabarga ko‘ra, suhbat davomida O‘zbekiston—Qozog‘iston strategik sheriklik munosabatlarini yanada rivojlantirish va ko‘p qirrali hamkorlikni kengaytirishning dolzarb masalalari ko‘rib chiqildi.

Amaliy hamkorlikni ilgari surish, eng avvalo, ikki tomonlama tovar ayirboshlash hajmini oshirish, mashinasozlik, energetika, qishloq xo‘jaligi, transport va logistika, farmatsevtika, to‘qimachilik va oziq-ovqat sanoati, boshqa ustuvor yo‘nalishlarda uzoq muddatli kooperatsiya loyihalarini tayyorlash va amalga oshirish masalalariga alohida e’tibor qaratildi.

Bundan tashqari, hududlararo aloqalar va madaniy-gumanitar almashinuvni faollashtirish muhim ekani qayd etildi. Ikki mamlakat hukumatlari tomonidan o‘zaro manfaatli hamkorlikning yangi yo‘nalishlari va aniq dasturlari ishlab chiqilishi yuzasidan kelishuvga erishildi.

Davlat rahbarlari, shuningdek, bo‘lajak oliy darajadagi uchrashuvlar rejasini ham ko‘rib chiqqan. Qozog‘iston prezidenti matbuot xizmatining ma’lum qilishicha, Shavkat Mirziyoyev Qozog‘istonga 2021-yil yakunigacha borishi kutilmoqda.

“Ko‘p qirrali Qozog‘iston—O‘zbekiston munosabatlariga amaliy turtki berish maqsadida prezidentlar joriy yil oxirigacha O‘zbekiston rahbari Shavkat Mirziyoyevning Qozog‘istonga davlat tashrifini tashkil etish bo‘yicha kelishuvga erishdi”, — deyiladi xabarda.

Eslatib o‘tamiz, Shavkat Mirziyoyev O‘zbekiston Prezidenti etib saylanganidan so‘ng Istanbulda o‘tkaziladigan Turkiy tilli davlatlar hamkorlik kengashining navbatdagi sammitida ishtirok etish uchun 11–12-noyabr kunlari Turkiyada bo‘ldi. Shavkat Mirziyoyev Rossiyaga borishi kutilmoqda. Prezident dekabr oyida Janubiy Koreyaga, 2022-yilda Vengriyaga  borishi rejalashtirilgan.