«Андижон нефть базаси» ва «Жиззах нефть базаси» собиқ раҳбар ва масъул ходимлари фаолияти давомида камомад, ходимларга асоссиз тўловлар ҳамда дебиторлик қарзларини вужудга келтиргани учун қўзғатилган жиноят иши судга оширилган. Бу ҳақда Бош прокуратура матбуот котиби Ҳаёт Шамсутдинов хабар берди.
Эслатиб ўтамиз, 2021 йилнинг 25 май куни «Андижон нефть базаси»даги талон-торож ва йўл қўйилган камчиликлар ортидан 10 нафар масъул мансабдор лавозимидан озод этилгани тўғрисида хабар берилганди. Унда «Андижон нефть базаси»да 24,3 миллиард сўм дебитор қарздорлик юзага келгани ва 2021 йил 1 апрель ҳолатига қарздорликлар муддати ўтган ҳисобланиши айтилганди.
Бундан ташқари, ўз вақтида ундирмагани учун «Андижон нефть базаси» бўйича 2006−2017 йилларга оид 8,6 миллиард сўм дебиторлик қарздорлиги «умидсиз қарз»га айланиб улгурган. 2019−2021 йилларда биржа савдолари орқали сотиб олмасдан, ноқонуний тарзда истеъмолчиларга юклаб жўнатган нефть маҳсулотлари ҳозирги кундаги харид нархлари билан солиштириб ҳисобланганда жами зарар миқдори 6,2 миллиард сўмдан ортиқни ташкил этиши айтилганди.
Жамият ва унинг филиаллари томонидан 408 та ҳолатда 129,7 миллион сўмлик иш ҳақи, моддий ёрдам ва мукофот пуллари ортиқча ҳисобланиб тўланган, компенсация тўловлари ноўрин ҳисобланган. Меҳнат шартномаси бекор қилинган 6 нафар собиқ ходим номига 29,997 миллион сўм иш ҳақи ёзилган.
Бош прокуратура матбуот котибининг маълум қилишича, «Андижон нефть базаси» МЧЖ мансабдор шахсларига нисбатан қўзғатилган жиноят иши 3 ноябрь куни айблов хулосаси билан мазмунан кўриб чиқишлик учун Андижон вилояти судига юборилган.
24 март куни амалда белгиланган меъёрий ҳужжатларга мунтазам амал қилмаслик оқибатида «Жиззах нефть базаси» МЧЖда 35,4 миллиард сўм дебитор қарздорлик юзага келгани тўғрисида хабар берилганди. Шу билан бирга, ўшанда жамият томонидан 788 нафар ходимга 806,9 миллион сўмлик компенсация тўловлари ноўрин ҳисоблангани маълум бўлганди.
Бундан ташқари, жамоа шартномасига зид тарзда интизомий жазо қўлланган 23 нафар ходимга 7,9 миллион сўм мукофот пули тўлаб берилган. Меҳнат шартномаси бекор қилинган 26 нафар собиқ ходимлар номига 33,8 миллион сўм иш ҳақи ёзилган. Шу муносабат билан «Жиззах нефть базаси» мансабдор шахсларига нисбатан қўзғатилган жиноят иши 27 сентябрь куни айблов хулосаси билан мазмунан кўриб чиқиш учун судга юборилган.
Эслатиб ўтамиз, «Ўзбекнефтгаз» АЖ бошқаруви раиси Меҳриддин Абдуллаев бошчилигида 2021 йилнинг 11 май куни ўтказилган видеоселектор йиғилишида иш фаолиятида йўл қўйган камчиликлари учун «Жиззах нефть базаси» директори М.Акбўтаев ва «Андижон нефть базаси» директори И.Болтабоев эгаллаб турган лавозимидан озод этилган эди.
Изоҳ (0)