Грузияга енгилган Ўзбекистон терма жамоаси, Зиданни қўллаб-қувватлайдиган Роналду ва Неймарни сотишни хоҳлаётган «ПСЖ». Энг сўнгги спорт янгиликлари

Дунё ва ўзбек спортига оид 15 ноябрь кунининг энг муҳим хабарлари дайжести билан танишинг.

Ўзбекистон

Ўзбекистон терма жамоаси ўртоқлик ўйинида Грузияга мағлуб бўлди

Футбол бўйича Ўзбекистон терма жамоаси ўртоқлик ўйинида Грузияга мағлуб бўлди. Учрашув тақдирини ҳал қилиб берган ягона гол 40-дақиқада Давид Волков томонидан киритилди.

Шу тариқа Ўзбекистон терма жамоаси Сречко Катанец бошчилигида кетма-кет 2-ўйинда мағлубиятга учради. Жамоа бунгача Иорданияга 0:3 ҳисобида мағлуб бўлганди.

«Насаф» қолдирилган тур ўйинида «Қўқон-1912»ни енгди

Футбол бўйича Ўзбекистон Суперлигасининг қолдирилган 24-туридан ўрин олган ўйинда «Насаф» ўз майдонида «Қўқон-1912»дан 3:1 ҳисобида устун келди.

«Насаф» ушбу натижадан кейин 44 очко билан 3-ўринга кўтарилиб олди. «Қўқон-1912» эса 32 очко билан 8-поғонадан жой олган.

Ўзбекистон самбо терма жамоаси ЖЧ да 2-ўринни эгаллади

Тошкент шаҳрида 12—14 ноябрь кунлари самбо бўйича Жаҳон чемпионати ўтказилди.

Мусобақада иштирок этган ўзбекистонлик самбочилар умумий ҳисобда 11 та медал қўлга киритди. Терма жамоа аъзолари 3 та олтин, 5 та кумуш ва 3 та бронза медалларига эга чиқди.

Қуйидаги спортчилар мусобақада ғолиб ва совриндор бўлди:

Олтин:

• -58 кг: Баҳодир Бакиев (жанговар самбо)
• -88 кг: Ихтиёр Эшмуродов
• -98 кг: Нодиржон Мирхаликов.

Кумуш:

• -79 кг: Улуғбек Раҳмонов
• -64 кг: Ойбек Солиев (жанговар самбо)
• -50 кг: Сабина Давлатова
• -79 кг: Фурқат Рўзиев (жанговар самбо)
• -88 кг: Соҳибжон Ҳасанбоев (жанговар самбо).

Бронза:

• -59 кг: Ибодатхон Агожонова
• +98 кг: Ҳакимжон Исмоилов (жанговар самбо)
• -71 кг: Истам Қудратов.

Ушбу натижа орқали Ўзбекистон терма жамоаси Жаҳон чемпионатини умумжамоа ҳисобида иккинчи ўринда якунлади. Биринчи ўринни Россия вакиллари эгаллаган бўлса (8 та олтин, 6 та кумуш, 4 та бронза), кучли учликка Беларусь терма жамоаси (3 та олтин, 5 та кумуш) якун ясади.

Жаҳон

Роналду «Манчестер Юнайтед» бош мураббийлиги учун Зиданни қўллаб-қувватлайди

«Манчестер Юнайтед»да мураббийлар алмашинуви рўй бериши мумкин.

Оле-Гуннар Сульшер жамоанинг сўнгги пайтлардаги қониқарсиз натижалари сабаб истеъфога чиқарилиш эҳтимоли мавжуд. Унинг ўрнига асосий номзод сифатида «Реал» собиқ бош мураббийи Зинедин Зидан кўрилмоқда.

Manchester Evening News хабарига кўра, «Манчестер Юнайтед» ҳужумчиси Криштиану Роналду агар Сульшер истеъфога чиқарилса, Зидан вариантини қўллаб-қувватлашини айтган.

Дани Алвес «Барселона»да энг кам маош олади

Дани Алвес «Барселона»га қайтиш учун кам маошга рози бўлди, деб ёзмоқда Diario Sport.

Қайд этилишича, 38 ёшли футболчига белгиланган маош жамоадаги энг паст маош ҳисобланади. Шу билан бирга, бразилияликнинг шартномасида бонус қисми ҳам кўзда тутилган бўлиб, у ютуқлар ва қўлга киритилган совринларга боғлиқ бўлади.

Алвес ЖЧ—2022 бошлангунга қадар, яъни бир йил муддатга шартнома имзолашни истаган эди, аммо мавсум охиригача мўлжалланган келишувга рози бўлди.

Клуб матбуот хизмати бразилиялик ҳимоячи тиббий кўрикдан муваффақиятли ўтгани ва 15 ноябрь куни жамоа билан илк машғулотини ўтказганини эълон қилди.

Мората — 7 йил ичида Испания терма жамоасида энг кўп гол урган футболчи

Испания терма жамоаси ҳужумчиси Альваро Мората ЖЧ—2022 саралаши доирасидаги Швецияга қарши ўйинда (1:0) ягона голга муаллифлик қилди.

«Ювентус» ҳужумчиси учун бу терма жамоа сафидаги 23-гол бўлди. Бунинг учун унга 50 та ўйин керак бўлди.

Мората 2014 йилнинг ноябридан, яъни Испания терма жамоасидаги дебютидан кейин бошқа ҳеч қайси футболчи Испания терма жамоаси сафида бунча кўп гол ура олмаган. Агар сўнгги 7 йилдаги давр олинса, Альваро энг яқин таъқибчисидан 10 та голга олдинда.

«ПСЖ» президенти Неймарни сотиб юбормоқчи

«ПСЖ» ҳужумчиси Неймар 2021/2022 йилги мавсум охирида жамоани тарк этиши мумкин, деб хабар беради El Nacional.

Манбанинг хабарига кўра, Париж клуби президенти Носир Ал-Ҳелайфи ёзги трансферлар вақтида Неймарни сотиш ҳақида ўйламоқда. «ПСЖ» раҳбари ушбу трансфердан максимал даражада кўпроқ маблағ олишни кутмоқда.

Ал-Ҳелайфи бразилияликнинг эҳтимолий трансфери юзасидан Европанинг бир қатор клублари билан боғланган. Бу клублар қаторида Англия жамоалари ва «Барселона» борлиги айтилмоқда.