Соғлиқни сақлаш вазири лавозимига тайинланган Беҳзод Мусаевнинг биринчи буйруғи аввалги вазир қўллаган интизомий жазо чораларини олиб ташлаш ҳақида бўлди, деб хабар беради «Xabar.uz».
Беҳзод Мусаев 11 ноябрда имзолаган буйруқда «шу кунгача соғлиқни сақлаш вазирининг буйруғи билан қўлланган барча интизомий жазо чоралари муддатидан илгари олиб ташлансин» дейилган.
11 ноябрь куни соғлиқни сақлаш вазири Абдуҳаким Хожибоев лавозимидан озод этилгани ва у Ўзбекистон касаба уюшмалари Федерациясига ўтиши кутилаётгани тўғрисида хабар берилганди. Шу куннинг ўзида Ўзбекистон Президентининг тегишли фармони билан бош вазир ўринбосари лавозимида ишлаб келган Беҳзод Мусаев соғлиқни сақлаш вазири этиб тайинланган.
Эслатиб ўтамиз, 2020 йилнинг июлида соғлиқни сақлаш вазири Алишер Шодмонов Республика ихтисослаштирилган кардиология илмий-амалий тиббиёт марказида стационар шароитда даволанган вақтида Беҳзод Мусаевга унинг вазифасини бажариш юклатилган эди.
Изоҳ (0)