Қашқадарёда «аёллар дафтари» ва «ёшлар дафтари»га киритилган 2 мингга яқин фуқарога кредит берилгани ёлғон бўлиб чиқди

Қашқадарёда Маҳалла ва оилани қўллаб-қувватлаш вазирлиги ҳамда Ёшлар ишлари агентлигининг вилоят масъуллари «аёллар дафтари» ва «ёшлар дафтари»дагиларга кредит ажратишда кўзбўямачиликка йўл қўйган. Бу ҳақда вилоят ҳокимлиги ахборот хизмати раҳбари Аҳрор Содиқовга таяниб, «Дарё» мухбири хабар берди.

Маълум қилинишича, 2021 йилнинг 31 октябрь ҳолатига кўра, вилоятда «ёшлар дафтари»га киритилган 48 797 нафар ёшдан 46 572 нафари, шундан 4 949 нафари имтиёзли кредитлар ажратилгани эвазига дафтардан чиқарилган. Ҳақиқий ҳолат ўрганилганда эса кредит олгани айтилган 4949 нафар ёшдан 588 нафарига аслида кредит ажратилмагани маълум бўлган.

«Яккабоғ туманида яшовчи 10 нафар ёш билан телефон орқали суҳбатлашилганда 3 нафари кредит олиш учун мурожаат қилмагани, 1 нафари мурожаат қилган бўлса-да, ижобий ҳал этилмагани маълум бўлди. Мисол учун, Яккабоғ тумани ‘Мустақиллик’ маҳалласида яшовчи Ш.Очилов томонидан тижорат банкларига мурожаат қилинмаган бўлса-да, ёшлар агентлигининг вилоят бошқармаси томонидан тақдим этилган маълумотларда ‘кредит ажратилган’ деб кўрсатилган», — дейилади Аҳрор Содиқовнинг ОАВ вакилларига тақдим этган маълумотида.

Зоир Мирзаевнинг матбуот котиби тақдим этган маълумотда ҳудудда «аёллар дафтари» бўйича ҳам ишлар қониқарсиз ташкил этилгани ойдинлашган.

Қайд этилишича, 2021 йилнинг 1 ноябрь куни Маҳалла ва оилани қўллаб-қувватлаш бошқармаси томонидан тақдим этилган электрон маълумот ва Марказий банкнинг электрон базаси солиштирилганида кредитлар ижобий ҳал этилди деб кўрсатилган 1340 та ҳолатда ёлғон маълумот берилгани маълум бўлган.

«250 нафар аёл билан телефон орқали гаплашилганда уларнинг 63 нафари кредит олиш учун мурожаат қилмагани маълум бўлди. Қарши тумани биринчи сектордаги Ш.Руҳутдинова, Қамаши тумани иккинчи сектор ҳудудидаги М.Бободўстова томонидан кредит олиш учун мурожаат қилинмаган бўлса-да, маҳалла ва оилаларни қўллаб қувватлаш бошқармаси томонидан тақдим этилган электрон маълумотда уларнинг мурожаати ‘ижобий ҳал этилди’ деб кўрсатилган», — дейилади маълумотда.

Аввалроқ Деҳқонободда «аёллар дафтари» ва «ёшлар дафтари»га киритилган фуқароларга 216 та тикув машинаси берилгани, Ўзбекистонда «аёллар дафтари» ва «темир дафтар»га кирган оилаларнинг фарзандлари бепул операция қилиниши, Шавкат Мирзиёев «Ёшлар дафтари» орқали ўз ишини бошлаган Азиза Самиғовага 3 хонали уй совға қилгани тўғрисида хабар берилганди.