«Ўзбекистон темир йўллари» АЖ томонидан 2021 йил 13 ноябрдан бошлаб Тошкент—Бухоро—Тошкент йўналишида 770/769-сонли «Афросиёб» замонавий поездларининг қатнови йўлга қўйилади. Бу ҳақда «Ўзтемир йўлйўловчи» АЖ матбуот хизмати хабар берди.
Қатновлар ҳафтанинг шанба, якшанба кунлари амалга оширилади. Ҳаракат жадвалига кўра шанба ва якшанба кунлари эрталаб соат 09:02 да Тошкент марказий темир йўл вокзалидан ҳаракатини амалга оширадиган 770-сонли «Афросиёб» замонавий поезди Самарқанд, Навоий темир йўл вокзалларида ҳам тўхтаб ўтиб, соат 12:47 да Бухоро-1 темир йўл вокзалига етиб боради.
Шунингдек, 769-сонли «Афросиёб» замонавий поезди ушбу кунларда соат 15:02 да Бухоро-1 темир йўл вокзалидан ҳаракатини амалга ошириб, соат 18:50 да Тошкент марказий темир йўл вокзалига кириб келади.
Бугунги кунда қатновини амалга ошираётган «Афросиёб» замонавий поездлари эса ўз ҳаракат жадвали бўйича ҳаракатланади.
Аввалроқ Тошкентдан Бухорога йўл олган «Афросиёб» поезди техник сабаб туфайли йўлда тўхтаб қолгани тўғрисида хабар берилганди.
Маълумот учун, 2019 йилнинг июнь ойида «Ўзбекистон темир йўллари» АЖ Испаниянинг Patentes Talgo S.L.U. компанияси билан Талго-250 серияли иккита тезюрар электропоезд сотиб олиш учун шартнома имзоланган. Келишувларга кўра, 2021 йил октябрь ойигача «Ўзбекистон темир йўллари» АЖ локомотив паркини иккита тезюрар «Афросиёб» электропоезди билан тўлдириш керак эди. Испаниянинг Patentes Talgo S.L.U. компанияси ўз мажбуриятларини тўлиқ ва ўз вақтида бажарган. 1 октябрь куни Тошкент марказий темир йўл вокзалида «Афросиёб» поездининг сўнгги таркибининг келиши тантанали равишда кутиб олинган эди.
Изоҳ (0)