Жанубий Африка Республикасининг собиқ президенти Фредерик Виллем де Клерк 85 ёшида ўзининг Кейптаундаги уйида вафот этди. Бу ҳақда Meduza хабар берди.
Қайд этилишича, де Клерк ёзда саратон касаллигига чалинган эди.
Фредерик Виллем де Клерк Жанубий Африкани 1989 йилдан 1994 йилгача бошқарган, у мамлакатнинг сўнгги оқ танли президенти бўлган. Унинг ҳукмронлиги даврида мамлакатда апартеид сиёсатига барҳам бериш ишлари олиб борилган.
1990 йилда де Клерк қора танлиларга нисбатан дискриминацияларга қарши чиққан Африка Миллий Конгрессини қонунийлаштирди, сўнг Жанубий Африканинг энг машҳур ўзгача фикрловчиси Нельсон Манделани қамоқдан озод қилди. Мандела умрининг 27 йилини ҳибсда ўтказганди.
1993 йилда Мандела билан бирга де Клерк ҳам тинчлик бўйича Нобель мукофотига сазовор бўлди. Де Клерк апартеид режимини тинч йўл билан тугатиш ва янги демократик ЖАР учун асос тайёрлаш бўйича ишлари учун тақдирланган.
1994 йилда мамлакатда кўппартиявий сайловлар бўлиб ўтди, унда Африка Миллий Конгресси ғалаба қозонди. Конгрессга раҳбарлик қилган Мандела ЖАРнинг янги президентига айланди.
Маълумот учун, апартеид режими Жанубий Африкада 1948 йилдан 1994 йилгача расман олиб борилган ирқий ажратиш сиёсати. Жанубий Африканинг қора танли аҳолиси вакиллари деярли барча фуқаролик ҳуқуқларидан маҳрум этилган, уларга махсус резервацияларда яшаш, уларни фақат махсус рухсатномалар билан тарк этиш буюрилган. Кенг маънода, апартеид ҳар қандай йўналиш бўйича ажратиш режимини англатади.
Эслатиб ўтамиз, сентябрь ойида Жазоирни 20 йил давомида бошқарган собиқ президент Абдулазиз Бутефлика вафот этган. Апрель ойида эса Чад давлатининг 30 йиллик президенти исёнчилар билан жангда ҳалок бўлган, шунингдек, АҚШ собиқ вице-президенти Уолтер Мондейл 93 ёшида вафот этганди.