Тошкент аэропортида телефонларнинг IMEI кодини рўйхатдан ўтказиш шохобчаси очилди

Тошкент аэропортида мобил қурилмаларнинг IMEI кодларини рўйхатдан ўтказиш шохобчаси очилди. Бу ҳақда Uzbekistan Airports матбуот хизмати хабар берди.

Қайд этилишича, майдони 8 квадрат метр бўлган хизмат кўрсатиш шохобчаси “E-auksion.uz” электрон платформаси орқали ўйналган. Ўзбекистон телекоммуникация тармоқларини бошқариш Республика маркази кимошди савдоси ғолиби деб топилган.

Мазкур шохобчада учиб келган барча йўловчилар бир неча дақиқа ичида импорт қилинган (янги ёки Ўзбекистондан ташқарида фойдаланилган) мобил қурилмаларнинг IMEI кодларини рўйхатдан ўтказишлари мумкин. IMEI кодини рўйхатдан ўтказиш нархи резидентлар учун 30 календарь кун ичида, норезидентлар учун эса 60 календарь кун ичида 68 минг сўмни (БХМнинг 20 фоизи) ташкил этади.

Ўзбекистон қонунчилигига мувофиқ, мобил қурилма IMEI кодини рўйхатдан ўтказиш маҳаллий уяли алоқа операторларининг SIM-карталари уланган кундан бошлаб 30 календарь кун (норезидентлар учун 60 календарь кун) ичида амалга оширилиши керак. Акс ҳолда, қурилманинг IMEI кодини рўйхатдан ўтказилгунига қадар абонентга маҳаллий GСМ уяли алоқа операторлари хизматларидан фойдаланиш тақиқланади.

Эслатиб ўтамиз, Ўзбекистондаги мобил телефонлар махсус IMEI коди бўйича рўйхатга олиниши тартиби 2019 йил 1 апрелдан жорий этилган. 2020 йил 22 сентябрь куни мобил қурилмаларнинг IMEI кодларини рўйхатдан ўтказиш тизими маъмурияти томонидан мобил қурилмаларни UzIMEI тизимида рўйхатдан ўтказиш жараёнига ўзгартириш киритилган, унга кўра, қурилманинг IMEI кодини/кодларини рўйхатдан ўтказишда жисмоний шахслар томонидан фойдаланиладиган абонент рақами маҳаллий мобил операторларидан ариза берувчи номига расмийлаштирилган бўлиши кераклиги белгиланганди. Қатор ОАВ ва блогерлар мазкур ўзгариш қонунга зид равишда амалга оширилган бўлиши мумкинлигини билдирган.

2021 йилда Ахборот технологиялари ва коммуникацияларини ривожлантириш вазири Шерзод Шерматов “Ўзбекистон телекоммуникация тармоқларини бошқариш Республика маркази” давлат унитар корхонаси фаолияти билан танишиш давомида “IMEI кодларини рўйхатдан ўтказишни янада осонлаштиришимиз керак” деганди.