Арманистонда коронавирус пандемияси сабабли жорий қилинган карантин режими яна олти ойга, 2022 йилнинг 20 июнига қадар узайтирилди. Тегишли қарор ҳукумат томонидан 11 ноябрь куни қабул қилинган, деб ёзади «Интерфакс».
Арманистонда карантин мамлакатга кириш ва чиқиш бўйича алоҳида режимни ҳамда ўз-ўзини яккалаш қоидаларини назарда тутади. У 20 декабрь куни тугаши керак эди.
Сўнгги бир неча кун ичида Арманистонда COVID-19 га чалиниш ҳолатлари ортди. Хусусан, ҳар куни ўртача 2 минг кишида инфекция қайд этилиб, 35—75 киши касалликдан вафот этмоқда.
Мамлакатда яшовчи қарийб уч миллион аҳолининг салкам 700 мингдан ортиғи коронавирусга қарши эмланган.
Аввалроқ Арманистон бош вазири Никол Пашинян мамлакатда коронавирус туфайли эпидемиологик вазият ниҳоятда кескинлашганини, бироқ ҳукумат локдаун эълон қилиш ниятида эмаслигини маълум қилганди.
Май ойида Никол Пашинян ва унинг рафиқаси Анна Акопян коронавирусга қарши эмланганди. Пашинян ва Акопян қандай вакцина билан эмлангани ҳақида маълумот берилмаган.