Sudan harbiy yetakchisi general Abdul Fattoh al-Burhon to‘rt nafar vazirni ozod qilish bo‘yicha topshiriq berdi, deb xabar beradi “Kommersant”. Ular davlat to‘ntarishi vaqtida qo‘lga olingan edi. Vazirlarning vakili Associated Press agentligiga ma’lum qilishicha, hozircha ular ozod etilmagan.
Hibsdan madaniyat va axborot vaziri Hamza Balyul, aloqa va raqamlashtirish vaziri Hoshim Xasab ar-Rasul, savdo va ta’minot vaziri Ali Gedo hamda yoshlar va sport vaziri Yusuf Odam ozod etilishi kerak bo‘lgan.
“Interfaks”ning yozishicha, AQSh davlat kotibi Entoni Blinken Sudan harbiy hokimiyati fuqarolik hukumatini qayta tiklashi va barcha qo‘lga olinganlarni ozod etishi kerakligini ma’lum qilgan.
Ta’kidlanishicha, AQSh davlat kotibi “Burhonni 25-oktabr kuni qo‘lga olingan barcha siyosiy arboblarni zudlik bilan ozod etishga va bosh vazir Xamdokni hokimiyatga qaytadigan hamda Sudanda fuqarolik boshqaruvini qayta tiklaydigan dialogga qaytishga chaqirgan”.
Davlat kotibi Sudan harbiylari AQSh bilan sheriklikni qayta tiklash borasidagi zarur harakatlarni amalga oshirishiga umid qilgan.
Eslatib o‘tamiz, Sudan harbiylari 25-oktabrga o‘tar kechasi mamlakat muvaqqat hukumatining bir qator vazirlarini, jumladan, muvaqqat bosh vazir Abdulla Xamdokni hibsga olgandi. Xamdok hamda uning rafiqasiga 27-oktabr — hisbga olinganidan bir kun o‘tib uyiga qaytishga ruxsat berilgan edi.
Sudanda harbiylar va fuqarolik kuchlari o‘rtasidagi munosabatlarda inqiroz bir necha haftadan beri davom etmoqda. Ziddiyatlarni muloqot orqali hal qilishga urinishlar kutilgan natijaga olib kelmagan, qarama-qarshi lagerlar o‘z tarafdorlarini ko‘chalarga olib chiqqan. Norozilik namoyishlari oqibatida yetti kishi halok bo‘lgan va yuzdan ortiq odam jarohat olgani aytilmoqda.
Izoh (0)