Лўли Марям образини тортиб олишганида касал бўлиб қолгани, тирикчилик учун савиясиз сериалларда ўйнаётгани, режиссёрлар билан кўп уришиши ҳақида Элмира Раҳимжонова билан интервью (видео)

Актриса Элмира Раҳимжонова «Дарё»га интервью берди. «Чархпалак» сериалидаги лўли Марям образи билан элга танилган актриса интервью давомида ундан ролини олиб қўйишганида бетоб бўлиб қолгани, ҳамма актрисалар бадавлат эмаслиги ҳамда режиссёрлар билан кўпинча нима сабабдан тортишиши ҳақида гапирди.

— Бу саволни кўп марта беришган. Аммо ҳамиша аниқ сабабини билмаслигимни айтганман. Яратганнинг ўзи кечирсин-у, аввалдан бизда режиссёр ўзларини Худо деб билишарди. Ҳозиргидек, режиссёрлар билан ўз дўстидек салом-алик қилинмасди. Уларга актёрларнинг  ҳурмати, эътибори ниҳоятда юқори бўлган.

«Чархпалак» сериалининг биринчи мавсумидан кейин мени Собир Назармуҳаммедов режиссёрлигидаги «Чаёнгул» фильмига таклиф қилишди. У плёнкага муҳрланадиган фильм бўлгани учун таклифни рад этолмадим. Раҳматли «Чархпалак» сериали режиссёри Шавкат Жунайдуллаевнинг ёнига бориб: «Катта кинога чақиришди, мени плёнкага олишар экан. Рухсат беринг бир ойда қайтиб келаман», деганимда рози бўлганди. Лекин мен ўшанда режиссёрнинг нафсониятига тегиб қўйганимни билмагандим. «Чаёнгул» фильмининг суратга олиш ишларидан қайтганимдан сўнг лўли Марям роли бошқа актрисага берилганини айтишди. Ролдан четлатилишимга айримлар ўйлагандек гонорар сабаб бўлмаган.Ролимни қизғонганимдан бир ҳафта касал бўлиб қолганман. Чунки ролни яратиш учун боримни бергандим. Ундан айрилиш менга оғир ботган.

Бундан ташқари, актриса нега кейинги пайтларда савияси у қадар юқори бўлмаган сериалларда суратга тушаётгани ҳақидаги саволга қуйидагича жавоб берди.

— Карантиндан кейин иқтисодий жиҳатдан қийналиб қолдим. Шу боис чап-ўнг оёқни ташлаб бўлса-да, сериалларда суратга тушишга мажбур бўляпман. Чунки биз ҳам бола-чақамизни об-ҳавога боқмаймиз-ку?! «Ўзбеккино» ва Ўзбекистон Республикаси Маданият вазирлиги балки актёр ва актрисаларнинг яшаш шароити ҳақида бошқача тасаввурга эгадир ёки улар фақат яхши яшайдиган актёрларни кўришгандир. Аммо ҳаммада шароит бир хил эмас.Актёр неча йил ишлашидан қатъи назар у яшаши, бола-чақасини боқиши керак. Кейинги пайтларда «Актёрлик касб эмас, ҳобби бўлиши керак. Ҳар бир артистнинг ҳеч бўлмаганда битта ресторани ёки дўкони бўлиши керак», — деган гапларни ҳам эшитяпмиз. Барака топгурлар, биз ҳали у даражага етганимиз йўқ, — дейди актриса.

Шунингдек, актриса ҳозирги режиссёр ва продюсерлар билан нима учун тортишиши ҳақида ҳам гапирди.

— Аслида ҳаммасига ўзим айбдорман. Баъзан ўз принспларимдан воз кечганим учун ўзимни койийман.Актёр гонорар ҳақини айтиши билан продюсер йиғлашни бошлайди. Бюджети камлигини билиб, инсонийлик юзасидан рози бўласиз. Аммо уларни актёрнинг соғлиғи, қорни оч-тўқлиги ёки рол учун кийимлари бор йўқлиги қизиқтирмайди. Бир эпизод суратга олингандан кейин актриса дам олиши керак, десангиз кўзига ёмон кўринасиз. Ахир биз ҳам одаммиз, аммо улар эртага камроқ харажат қилиш учун 20 та эпизодни бир кунда олишга ҳаракат қилишади. Бу жуда ёмон ва ачинарли ҳол. Шу боис кейинги пайтларда пулингиз ҳам керакмас, ролга чақирманглар, дейдиган бўлганман, — дейди актриса Элмира Раҳимжонова.

Элмира Раҳимжонова билан интервьюни тўлиқлигича қуйида томоша қилишингиз мумкин.