28 октябрь куни Ўзбекистоннинг барча ҳудудида «Миллий сувенирлар» фестивали бўлиб ўтади. Бу ҳақда Туризм ва спорт вазирлиги ҳузуридаги Маданий мерос агентлиги хабар берди.
Маълум қилинишича, фестиваль доирасида ҳунармандларнинг кўргазма-савдоси, кўрик-танлови, маҳорат дарслари ўтказилади, шу билан бирга фолклор-этнографик гуруҳлари ва бадиий жамоаларнинг чиқишлари ташкил этилади. Фестивальнинг расмий очилиш ва ёпилиш маросими Ўзбекистон амалий санъат ва ҳунармандчилик тарихи давлат музейида бўлиб ўтади.
Фестиваль «Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида»ги Президент фармони билан тасдиқланган режа асосида ўтказилмоқда. Фестивалдан кутилаётган натижа — тадбир иштирокчилари томонидан яратилган миллий сувенирлар савдосини йўлга қўйиш орқали республика музейлари ва маданий мерос объектларига ташриф буюрувчилар тўғридан-тўғри ушбу объэктларнинг тарғиботчисига айланади. Бу эса ҳудудларни барқарор ижтимоий-иқтисодий ривожлантиришга, ҳунармандлар бандлигини таъминлашга ҳамда уларни ҳам моддий, ҳам маънавий қўллаб-қувватлашга хизмат қилади.
Фестиваль якунида «Энг яхши сувенир» номинацияси бўйича ҳар бир ҳудуд учун алоҳида 1 ,2, 3-совринли ўринлар белгиланган ва ғолиблар тадбир сўнгида муносиб тақдирланади.
Эслатиб ўтамиз, 2018 йилда Фарғонада халқаро кулоллар ва кулолчилик маҳсулотлари фестивали ўтказилган эди.
Изоҳ (0)