XXI асрда ҳар бир соҳа вакилининг камида битта хорижий тилни билиши одатга айланяпти. Дунё кезиш ва муваффақиятли карьера орзуси сабаб аксарият одамлар, айниқса, ёшлар бир қанча чет тилини ўрганмоқда. Қуйида ўзбек шоу-бизнес вакиллари орасида уч, тўртта хорижий тилда бийрон гапирадиган машҳурлар ҳақида сўз юритамиз.
Муножот Йўлчиева
Ўзбекистон Қаҳрамони Муножот Йўлчиева рус, инглиз ва француз тилида гаплаша олади, форс тилида эса қисман мулоқот қилади.
«Русча ва французчани ўқувчилик давримда ўрганганман. Француз тилига қизиқишим баландлиги учун синфдошларим орасида яхши ўқишга қаттиқ интилардим. Ҳатто келажакда таржимон бўлишни ҳам орзу қилганман.
Инглиз тилини катта фарзандимнинг мактабда бу фандан қандай баҳога ўқиётгани, қай даражада билишини назорат қилиш мақсадида биргаликда ўрганганман. Кунора уйимизга репититор келиб, ўғлим иккимизга машғулотлар ўтарди.
Форс тилини талабалик йиллари ўрганишга мажбур бўлганман. Бу тил ғазалларни таҳлил қилишда катта аҳамиятга эга. Форс тилидаги матнларни ўқиб, тушуна оламан. Аммо форсча мулоқот қилишга бироз қийналаман.
Вақт томонлама имкониятим бўлганида, рус, инглиз ва форс тилларидаги билимларимни янада мустаҳкамлаган бўлардим. Кундалик ҳаётда асосан, ўзбек тилида гаплашиб, эшитганим учун мазкур тиллардаги айрим сўзлар ёдимдан чиқиб қолади. Амалиёт, жонли мулоқот давомида одамнинг тил борасидаги билими, тажрибаси шаклланиб боришига амин бўлдим», — дейди Муножот Йўлчиева.
Юлдуз Усмонова
Ўзбекистон халқ артисти Юлдуз Усмонова рус, инглиз, турк ва тожик тилларида эркин сўзлаша олади. Бир муддат Туркияда яшаб, ижод қилган санъаткор айни пайтда араб тили бўйича билимларини мустаҳкамламоқда.
Озодбек Назарбеков
Маданият вазири Озодбек Назарбеков рус ва турк тилларида таржимонсиз гаплашади. Касб тақазоси сабаб хориж тилларини ўзлаштиришга мажбур бўлган. «Инглиз тилини ўрганиш режамда бор», — дейди санъаткор.
Озода Нурсаидова
Ўз рэпертуарини бир қанча чет тилидаги қўшиқлар билан ҳам бойитган хонанда Озода Нурсаидова тўртта тилда бемалол гаплашади.
«Авваллари тил ўрганишга қизиқишим кучли эди. Иштиёқ, қунт ва ҳаракатим сабаб рус, инглиз, турк ҳамда форс тилларида таржимонсиз гаплашадиган бўлдим. Араб тилини эса қисман биламан. Лекин бу тилни ҳам пухта ўрганиш мақсадим йўқ эмас. Вақт жиҳатидан муаммо бўлмаганида, француз тилини ўрганардим», — деди Озода Нурсаидова.
Севара Назархон
Ўзбекистонда хизмат кўрсатган артист Севара Назархонни ҳам полиглот санъаткорлар сафига қўшиш мумкин. Оиласи билан Лондонда яшайдиган хонанда рус, инглиз ҳамда француз тилларида бемалол мулоқот қилади.
Отабек Маҳкамов
Айни пайтда Америкада яшаб, фаолият юритаётган серқирра инсон: юрист, актёр ва бошловчи Отабек Маҳкамов ўқувчилик даврида учта тилни пухта ўрганганини таъкидлади.
«Жаҳон тиллари гимназиясида ўқиган давримда рус, инглиз ва француз тилларини яхши ўзлаштирганман. Кейинчалик форс, турк, араб ва немис тилларида оз бўлса-да, гаплашишни ўргандим. Ҳозирги кунда испан тили бўйича билимларимни оширяпман.
Имкон бўлиб қолса, япон, хитой ва дунёнинг энг ноанъанавий тилларидан бири ҳисобланган Amazonиянинг пирахан тилини ўрганган бўлардим», — деди Отабек Маҳкамов.
Унинг айтишича, у жаҳон адабиёти намуналарини оргинал тилда ўқиш, киноларни таржимасиз кўриш, севимли хориж қўшиқларининг маъносини тушуниш мақсадида чет тилларини ўрганишга қарор қилган.
Муниса Ризаева
Хонанда Муниса Ризаева тўртта: рус, инглиз, француз ва испан тилларида эркин мулоқот қилишини қайд этди. Тожик тилида сўзлашишга бироз қийналади.
Ўн йилча Лондонда яшаб, Англия давлат консерваторияси ҳамда Меҳмонхона тижорати ва туризм йўналишида таҳсил олган ижодкор яна иккита тилни ўрганиш нияти борлигини айтди.
«Вақт топиб, араб ва хитой тилларини ўрганиш режамда бор. Бу икки тил ҳар доим оммавий мулоқот воситаси ҳисобланган. Шунингдек, Қуръони Каримни ҳам, албатта, ўрганмоқчиман», — дейди қўшиқчи.
Нилуфар Усмонова
Устазода санъаткор Нилуфар Усмонова ҳам учта: рус, инглиз ва турк тилларида эркин гаплашади. Болалигида маълум вақт Англияда таҳсил олган хонанда тил ўрганишга жуда қизиқади. У ҳозирда корейс тилини ўрганмоқда.
Алихан
Ўн йилдан ортиқ вақт океан ортида яшаб, ҳатто Голиввуд фильмларида рол ўйнаган актёр Алиханнинг таъкидлашича, чет тилини билган одамнинг имкониятлари анча кенгаяди.
«Рус тилини болалигимда, инглиз тилини АҚШда яшаган давримда ўрганганман. Аслида, Америкага боришимга инглиз тилини ўрганиш орзум ҳам бир сабаб бўлган. ‘Мендирман Жалолиддин’ сериалининг суратга олиш жараёни туфайли салкам бир йил Туркияда яшадик ва туркча ўрганишга мажбур бўлдик. Ҳозир турк тилида ҳам эркин гаплашаман.
Инглиз тилини билганим учун Хитойга борсам ҳам, Дубайда ҳам мулоқотга киришишга қийналмайман. Тил билган одам ҳеч нарса ютқазмайди, балки кўплаб имкониятларни қўлга киритади.
Вақтим бўлганида, француз ва испан тилларини ўрганардим. Бу икки тил менга ёқади ва жуда қизиқарли», — деди Алихан.
Шаҳзода Матчонова
Китобхон актриса сифатида кўпчиликка таниш Шаҳзода Матчонова рус, инглиз ва турк тилларини билади. Қайд этиш керакки, у Instagram саҳифасидаги постларининг аксариятини рус тилида ёзади.
Миролим Исажонов ёзиб олди
Изоҳ (0)