«Ўзавтовокзал сервис» ДУК ижтимоий тармоқларда тарқалган Тошкент автовокзали ходими фуқарога куч ишлатгани тасвирланган видео юзасидан маълумот берди.
Ижтимоий тармоқларда вокзал ходими ўзини тасвирга олган фуқарога куч ишлатишга урингани тасвирланган видео тарқалди:
Маълум қилинишича, ушбу ҳолат 24 октябрь куни содир бўлган. Ижтимоий тармоқда эълон қилинган ҳолатни тасвирга олган фуқаро Сурхондарё вилояти Термиз шаҳрида истиқомат қилувчи М.А ҳисобланади. У автовокзал қўриқлаш хизмати ходими ўзига нисбатан куч ишлатилиши билан боғлиқ ҳолат рўй беришдан аввал Тошкент автовокзалининг кутиш залига кириб, бу ерда ўз меҳнат фаолиятини олиб бораётган аёл ходимларни уятли сўзлар билан ҳақоратлаб, жамоат тартибини ва фуқароларнинг осойишталигини бузувчи хатти-ҳаракатларни содир этган.
Ўз навбатида, автовокзал қўриқлаш хизмати ходими Н.А. воқеа жойига етиб келиб, жамоат тартибини бузаётган фуқаро М.А.га нисбатан қонуний чора кўришни таъминлаш мақсадида уни ушбу ҳудудда жойлашган милиция таянч пунктига олиб бормоқчи бўлган вақтида ўз хизмат ваколатидан четга чиқиш билан боғлиқ ҳаракатларни содир этган.
«Ўзавтовокзал сервис» ДУК ушбу воқеа юзасидан ҳуқуқни муҳофаза қилувчи органлар билан ҳамкорликда ҳолат юзасидан ўрганиш ва суриштирув ишларини олиб борган.
Ўрганиш натижаларига кўра, фуқаро М.А. Тошкент автовокзали ҳудудида жамоат тартибини ва фуқароларнинг осойишталигини бузувчи хатти-ҳаракатларни спиртли ичимлик таъсири остида содир этгани маълум бўлган. Шунингдек, автовокзал қўриқлаш хизмати ходими Н.А. ўз хизмат ваколатидан четга чиқиш билан боғлиқ ҳаракатларни содир этгани ойдинлашган.
Ушбу ҳолат юзасидан фуқаро М.А. ва автовокзал ходими Н.А.га нисбатан Маъмурий жавобгарлик тўғрисидаги кодекснинг 183-моддаси (майда безорилик) бўйича маъмурий иш очилган.
Таъкидланишича, келгусида бу каби ҳолатлар такрорланмаслигининг олдини олиш мақсадида Тошкент автовокзали барча ходимлари қатъий огоҳлантирилиб, йўловчиларга хушмуомала бўлишлари, одоб-ахлоқ қоидаларига қатъий риоя этишлари юзасидан тушунтириш ишлари олиб борилган.
Аввалроқ Бухорода Миллий гвардия ходимига қаршилик кўрсатган фуқарога нисбатан жиноят иши қўзғатилгани, Наманганда прокуратура ходими аёл кишига куч ишлатгани, Тошкентда 73 ёшли эркакка куч ишлатган ППХ ходимларига суд ҳукми ўқилгани тўғрисида хабар берилганди.
Изоҳ (0)