Қозоғистонлик журналист Нурсеит Жилқишибай Ўзбекистон спорт курашлари ассоциацияси президенти Салим Абдувалиевнинг дала ҳовлисидан репортаж тайёрлади.
Репортажда айтилишича, дала ҳовли 7 гектар ҳудудда жойлашган ҳамда қурилиши давом этаётган бир нечта ҳашаматли уйлардан иборат. Уйларнинг дизайни бир-бирини такрорламайди. Қуриб битказилган уйларга ҳашаматли мебеллар, жиҳозлар ўрнатилган. У ерда , шунингдек, «Қизил китоб»га киритилган ҳайвонлар музейи, катта кутубхона ҳам бор.
Шунингдек, репортажда Салим Абдувалиев фермерлик билан ҳам шуғулланиши, 100 гектардан ортиқ ерни ижарага олиб, мева-сабзавот етиштиришини ҳам айтиб ўтган.
«Ҳозир биз турган жойнинг 100 гектардан ошиқроғига эгалик қиламан. Шундан 5—6 гектари хусусий мулким, қолганини эса ижарага олганман. Фермерлик билан шуғулланаман. Мен бу ерни 18 йилдан бери қураман. Жиддий дўстларим бор. Улар меникига келганида уялиб қолганман. Кейин бошқалардан нима кам жойим бор, деб ўйлаганман ва қуришни бошлаганман. Италия, Франция, Англияда ўқиганимда кўриб ҳавас қилганман. Ҳаммамиз бир хил одаммиз. Улардан кам жойимиз йўқ. Шундан сўнг осиёликлар ҳам нимадир қура олишини исботламоқчи бўлдим. Агар биз ўз вақтида бутун дунёни забт этган бўлсак, нимага биз бошқа ишларни қила олмаймиз?», — дейди Салим Абдувалиев.
Журналист Салим Абдувалиевга «Нега сизни ҳамма Салимбойвачча дейишади? Сиз бой инсонмисиз?» деб савол берган. Салим Абдувалиев ушбу саволга жавобан:
«Йўқ, мен қалбан бой инсонман. Бойвачча бу эркалаш маъносида. Кимгадир ёрдам берган, ҳомийлик қилган, яхшилик қилган инсонларни бизда бойвачча дейишади», — дея жавоб берган.
Изоҳ (0)