Qozog‘istonlik jurnalist Nurseit Jilqishibay O‘zbekiston sport kurashlari assotsiatsiyasi prezidenti Salim Abduvaliyevning dala hovlisidan reportaj tayyorladi.
Reportajda aytilishicha, dala hovli 7 gektar hududda joylashgan hamda qurilishi davom etayotgan bir nechta hashamatli uylardan iborat. Uylarning dizayni bir-birini takrorlamaydi. Qurib bitkazilgan uylarga hashamatli mebellar, jihozlar o‘rnatilgan. U yerda , shuningdek, “Qizil kitob”ga kiritilgan hayvonlar muzeyi, katta kutubxona ham bor.
Shuningdek, reportajda Salim Abduvaliyev fermerlik bilan ham shug‘ullanishi, 100 gektardan ortiq yerni ijaraga olib, meva-sabzavot yetishtirishini ham aytib o‘tgan.
“Hozir biz turgan joyning 100 gektardan oshiqrog‘iga egalik qilaman. Shundan 5—6 gektari xususiy mulkim, qolganini esa ijaraga olganman. Fermerlik bilan shug‘ullanaman. Men bu yerni 18 yildan beri quraman. Jiddiy do‘stlarim bor. Ular menikiga kelganida uyalib qolganman. Keyin boshqalardan nima kam joyim bor, deb o‘ylaganman va qurishni boshlaganman. Italiya, Fransiya, Angliyada o‘qiganimda ko‘rib havas qilganman. Hammamiz bir xil odammiz. Ulardan kam joyimiz yo‘q. Shundan so‘ng osiyoliklar ham nimadir qura olishini isbotlamoqchi bo‘ldim. Agar biz o‘z vaqtida butun dunyoni zabt etgan bo‘lsak, nimaga biz boshqa ishlarni qila olmaymiz?”, — deydi Salim Abduvaliyev.
Jurnalist Salim Abduvaliyevga “Nega sizni hamma Salimboyvachcha deyishadi? Siz boy insonmisiz?” deb savol bergan. Salim Abduvaliyev ushbu savolga javoban:
“Yo‘q, men qalban boy insonman. Boyvachcha bu erkalash ma’nosida. Kimgadir yordam bergan, homiylik qilgan, yaxshilik qilgan insonlarni bizda boyvachcha deyishadi”, — deya javob bergan.
Izoh (0)