АҚШ Давлат департаменти 25 октябрь куни Ўзбекистонда бўлиб ўтган президентлик сайловлари натижалари бўйича баёнот берди, деб хабар беради «Gazeta.uz».
Баёнотда айтилишича, АҚШ «Ўзбекистон халқининг 24 октябрь куни бўлиб ўтадиган президентлик сайловларида овоз бериш ҳуқуқидан фойдаланишини қўллаб-қувватлайди».
Давлат департаменти Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси миссиясининг овоз бериш тинч ўтгани ва сайловчиларнинг юқори фаоллиги билан тавсифлангани ҳақидаги кузатувига қўшилган. Шу қатори, Қўшма Штатлар ЕХҲТ миссиясининг айрим масалалар бўйича «ташвишларига шерик» экани таъкидланган.
Давлат департаменти Ўзбекистон ҳукуматининг ЕХҲТ ДИИҲБ кузатув миссияси билан ҳамкорлигини маъқуллаган ва ЕХҲТнинг сайловлар, фуқаролик ва сиёсий ҳуқуқларни таъминлаш бўйича тавсияларини амалга оширишга чақирган.
«Биз Ўзбекистон ҳукумати билан ушбу ва бошқа кўплаб икки томонлама ва минтақавий аҳамиятга молик масалалар бўйича ҳамкорликни давом эттириш тарафдоримиз», — дейилади баёнотда.
Аввалроқ ЕХҲТнинг махсус координатори Рейнхолд Лопатка Ўзбекистондаги сайлов жараёнининг яхшиланганини қайд этганди. «Сизлар тўғри йўлдасизлар, лекин бу охирги қадам эмас, навбатдаги қадамларни ҳам қўйиш керак», — деган эди у.
Россия Федерал Кенгаши қўмитаси раиси ўринбосари Фарит Мухамецҳин Ўзбекистонда президент сайловлари халқаро стандартларга мос ўтказилганини таъкидлаган эди. Унинг фикрига кўра, номзодлар илгари сурган дастурлар умуман олганда «ўзбек халқининг кутилмаларига жавоб беради».
Изоҳ (0)