Дунё ва ўзбек спортига оид 22 октябрь кунининг энг муҳим хабарлари дайжести билан танишинг.
Ўзбекистон
Дзюдо федерацияси Диёрбек Ўрозбоевнинг дисквалификацияси борасида муносабат билдирди
Ўзбекистон дзюдо федерацияси матбуот хизмати Рио—2016 Олимпиадасининг бронза медали соҳиби Диёрбек Ўрозбоевда допинг аниқлангани масаласи бўйича расмий муносабат билдирди.
Муносабатда Ўрозбоевнинг дзюдо бўйича миллий терма жамоа аъзоси эканлиги таъкидлаб ўтилган. Бироқ Ўзбекистон дзюдо федерацияси Диёрбек 2021 йилнинг февраль ойидан бери терма жамоа йиғинларида иштирок этмаётгани сабаб Ўзбекистон дзюдо миллий терма жамоаси аъзолигидан чиқарилганини таъкидлаган.
Аввалроқ Ўзбекистон Миллий антидопинг агентлиги томонидан ўтказилган таҳлиллардан кейин Диёрбек Ўрозбоев тақиқланган модда истеъмол қилгани ва шу сабаб 3 йилга дисквалификация қилингани ҳақида хабар қилинганди.
Суперлиганинг 23-туридан ўрин олган икки ўйин бўлиб ўтди
22 октябрь куни Суперлиганинг 23-туридан ўрин олган икки ўйин бўлиб ўтди. Унда «Сурхон» ўз майдонида «Қизилқум»дан устун келди. «Бунёдкор» эса Тошкентда сўнгги дақиқаларда «Турон»ни таслим этди.
Турнинг қолган ўйинлари 23—25 октябрь кунлари бўлиб ўтади.
Жаҳон
Ҳоланд бир неча ҳафтага сафдан чиқди
«Боруссия Д» ҳужумчиси Эрлинг Ҳоланд жароҳати сабаб бир неча ҳафтага сафдан чиқди. Бу ҳақда жамоа бош мураббийи Марко Розе маълум қилди.
Норвегиялик футболчининг мушаклари шикастланган ва яқин орадаги ўйинларда «арилар»га ёрдам бера олмайди.
Қайд этиш керак, Ҳоланд сентябрь ойида ҳам жароҳат олиб, бир ой муддатга сафдан чиққанди ва октябрь ўртасида майдонга қайтганди.
Чемпионлар Лигасида ҳафта рамзий терма жамоаси эълон қилинди
Чемпионлар Лигаси 3-тур якунлари бўйича ҳафта рамзий (фентези) терма жамоаси эълон қилинди.
Терма жамоа қуйидагича кўриниш олди:
Дарвозабон: Иво Грбич («Лилль»);
Ҳимоячилар: Хорди Альба, Херард Пике (иккиси «Барселона»), Дейли Блинд («Аякс»), Себастьян Коатес («Спортинг»);
Ярим ҳимоячилар: Ноа Окафор («Зальцбург»), Жоржиньо («Челси»), Риёд Маҳрез («Ман Сити»);
Ҳужумчилар: Лерой Сане («Бавария»), Муҳаммад Салоҳ («Ливерпуль»), Винисиус Жуниор («Реал М»).
«ПСЖ» ҳимоячиси Серхио Рамос жароҳатидан тикланишда давом этмоқда.
Le Parisien’га кўра, испаниялик футболчи 22 октябрь куни индивидуал тарзда машғулот ўтказган. Рамос келаси ҳафта бошида «ПСЖ»нинг умумий гуруҳига қўшилиши кутилмоқда.
Таъкидланишича, Рамос «ПСЖ»даги дебютини ноябрь ойида ўтказади. Қайд этиш керак, 35 ёшли футболчи мушакларидаги жароҳати туфайли ҳамон янги клубида майдонга тушгани йўқ.
Моуриньо жамоаси илк марта 6 та гол ўтказиб юборди
Жозе Моуриньо бошчилигидаги «Рома» Конференциялар Лигаси доирасидаги ўйинда «Будё Глимпт»га 1:6 ҳисобида ютқазди.
Шу тариқа Моуриньо устозлик қилган жамоа илк марта ўз дарвозасидан 6 та гол ўтказиб юборди. Бунгача португалиялик мутахассис бошқарган жамоалар 5 тадан кўп гол ўтказмаганди, шу пайтга қадар унинг фаолиятидаги энг йирик ҳисоб 2010 йилда қайд этилганди: унинг қўл остидаги «Реал» «Барселона»га 0:5 ҳисобида мағлуб бўлганди.
«Будё Глимпт»га қарши баҳс Жозе учун фаолиятидаги 1008-ўйин бўлди.
Бруну Фернандеш «Ливерпуль»га қарши ўйинни ўтказиб юбориши мумкин
«Манчестер Юнайтед» ярим ҳимоячиси Бруну Фернандеш Англия Премьер Лигасининг 9-туридан ўрин олган «Ливерпуль»га қарши ўйинни ўтказиб юбориши мумкин.
«Қизиллар» бош мураббийи Оле-Гуннар Сульшернинг таъкидлашича, португалиялик футболчи Чемпионлар Лигаси доирасидаги «Аталанта»га қарши ўйинда кичик жароҳат олган. Бу унинг якшанба оқшомида «Ливерпуль»га қарши кечадиган баҳсда майдонга тушишини сўроқ остида қолдирмоқда.
Эслатиб ўтамиз, «Ман Юнайтед» — «Ливерпуль» учрашуви 24 октябрь куни соат 20:30 да бошланади.
Дибаланинг уйини ўғри уриб кетди
«Ювентус» ҳужумчиси Пауло Дибаланинг уйида ўғрилик юз берди.
La Gazzetta dello Sport нашрининг хабар беришича, ўғрилар сешанба куни кечқурун 27 ёшли футболчининг Турин яқинидаги вилласига ойна орқали кирган.
Босқинчиларни ҳудудни кузатаётган қўриқчи пайқаб қолган. Ҳозирча зарар қиймати номаълум. Бироқ ўғрилар Дибалага тегишли бўлган соат коллекциясини олиб чиқиб кетгани тахмин қилинмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)