«Миллий тикланиш» демократик партиясидан номзод Алишер Қодиров 21 октябрь, пайшанба куни тошкентлик сайловчилар билан учрашувда президентлик сайловида ғолиб бўлиш имкониятини баҳолади.
«Мен ҳозир тахмин қилмоқчи эмасман. Сайловнинг натижалари эълон қилингандан кейин маълум бўлади. Лекин мен бир нарсани эътироф этиб кетишим керак, тажриба ёки сиёсий нуқтаи назардан бўладими, барча масалалар бўйича Ўзбекистонда бугун келаётган рақобат муҳитида яққол фикрлар ажралиб турибди. Ва бизнинг фикрларимиз одамларга ёқмаётган бўлиши мумкин», — деган у «Gazeta.uz»нинг бу борадаги саволига жавобан.
Алишер Қодиров, шунингдек, мигрантлардан солиқ ундириш борасидаги таклифига ҳам тўхталиб ўтган.
«Мана битта айтган таклифимизга шунча негатив муносабат. Мен шунақа гапимни тушунтира олмаётган пайтимда ҳам шу миллат, ватан ҳақида ўйлаяпман, лекин одамлар мени тушунмаётган пайтда ғалабадан умидвор бўлишим мумкинми? Афсус билан айтиш керак, агар одамлар мени тушунмаётган бўлса, менга овоз бермайди», — деган у.
Шунга қарамасдан, ғояларни илгари суришдан тўхтамаслигини қўшимча қилган.
«Лекин мен гапдан тўхтамоқчи эмасман, давом эттиравераман. Эҳтимол, ғалабадан умидвор эмасдирман, лекин натижада одамлар, албатта, ўзгаради. Ишончим комил, Ўзбекистоннинг жамияти барибир ўзгаради», — деган Алишер Қодиров.
Эслатиб ўтамиз, «Миллий тикланиш» демократик партиясидан президентликка номзод Алишер Қодиров 14 октябрь куни Андижон вилоятидаги сайловчилар билан бўлиб ўтган учрашувда мигрантлардан ҳам солиқ ундириш таклифини билдирганди. Орадан икки кун ўтиб Шавкат Мирзиёев бунга муносабат билдириб, мигрантларни «фидойи фарзандларим» деб атади ва агар раҳбар бўлиб ишласа, улар ҳеч қачон солиққа тортилмаслигини айтди.
Давлат солиқ қўмитаси матбуот котиби Музаффар Назаров келтирилган ташаббусни амалга ошириш бўйича ҳозирда ҳеч қандай таклифлар йўқлигини «Дарё»га маълум қилди.
Изоҳ (0)