Туркия президенти Ражаб Тоййиб Эрдўғон асли Парижда туғилган филантроп ва жамият фаоли, 2017 йилдан буён Туркияда суд ҳукми ўқилмаганига қарамай ҳамон ҳибсда сақланаётган 64 ёшли Усмон Кавалани ҳимоя қилган мамлакатларнинг элчиларини Анқарадан чиқариб юбориши ҳақида огоҳлантирди. Бу ҳақда France 24 телеканали хабар берган.
«Туркияга унинг ўзига тегишли ҳудудда сабоқ беришга уриниш сизнингча қанчалик тўғри? Бу ишни қилиш ҳуқуқини қаердан олдинглар ва ўзи кимсизлар?» — деган Эрдўғон.
«Мен ташқи ишлар вазирига ўзимизга бу қадар ҳашамдорликни (элчиларни мамлакат ҳудудида қолишини) раво кўра олмаслигимизни айтдим», — дея Эрдўғон сўзларидан иқтибос келтирган телеканал.
France 24 18 октябрь куни Германия, Дания, Канада, Нидерландия, Янги Зеландия, Норвегия, АҚШ, Финляндия ва Швеция элчилари қўшма баёнотни эълон қилган. Унда Туркия ҳукуматидан Кавала бўйича масалага тезкорлик билан адолатли ечим топиш сўралган эди. Элчилар фаолнинг ҳибсда сақланиши Туркия учун «кўланка» эканлигини қайд этган.
Баёнот эълон қилинган куннинг эртасига, яъни 19 октябрда 10 та мамлакатнинг элчилари Туркия Ташқи ишлар вазирлигига чақирилган.
64 ёшли туркиялик филантроп ва Парижда яшаган фаол Усмон Кавала 2017 йилдан буён ҳеч қандай суд айблов ҳукмисиз қамоқда сақланмоқда. Унга қарши 2013 йилда ҳукуматни ағдаришга қаратилган норозилик намойишларини ўтказиш, шунингдек, 2016 йилда Туркияда ҳарбий тўнтариш уюштиришга уриниш бўйича айбловлар эълон қилинган.
Изоҳ (0)