Korrupsiyaga qarshi kurashish agentligi direktori Akmal Burhonov “O‘zbekistonning milliy manfaatlariga va xalqaro imijiga zarar yetkazuvchi jinoyatlarni tergov natijalarini kompleks tahlili” bo‘yicha axborotni e’lon qildi.
Foto: “Daryo” / Madina Nurman
Burhonovning yozishicha, islohotlar natijasida O‘zbekistonning xalqaro reyting va indekslardagi ko‘rsatkichlari oshib bormoqda.
Jumladan, 2021-yil yanvar oyida e’lon qilingan Transparency International xalqaro nohukumat tashkiloti tomonidan 2020-yil bo‘yicha “Korrupsiyani qabul qilish indeksi” reytingida O‘zbekiston 180 ta davlat orasida 146-o‘rinni egallab, 7 pog‘onaga ko‘tarilgan. 2019-yilda O‘zbekiston 153-o‘rinni egallagan bo‘lsa, 2018-yilda bu ko‘rsatkich 158-o‘rinni tashkil etgan. O‘zbekiston ikki yil ichida 12 pog‘ona ko‘tarilib, Markaziy Osiyo mintaqasida korrupsiyaga qarshi kurashishda eng barqaror ko‘rsatkichni namoyish etmoqda.
Ma’lum qilinishicha, 2021-yilning 6 oyi mobaynida mamlakatda 2544 nafar mansabdor shaxsga nisbatan korrupsiya holatlari bilan bog‘liq bo‘lgan 1676 ta jinoyat ishlari tergov qilinib, sudlarga yuborilgan.
Tahlilga ko‘ra, jinoiy javobgarlikka tortilgan eng ko‘p mansabdorlar Sog‘liqni saqlash vazirligi tizimida faoliyat yuritadi (107 ta), eng kami esa Agrosanoat majmui ustidan nazorat qilish inspeksiyasi tizimida (4 ta) qayd etilgan. Shuningdek:
- Xalq ta’limi vazirligida — 74 nafar;
- davlat ulushi bo‘lgan davlat tashkilotlarida — 69 nafar;
- banklarda — 66 nafar;
- Maktabgacha ta’lim vazirligida — 64 nafar;
- Transport vazirligida — 55 nafar;
- Energetika vazirligida 32 nafar mansabdor shaxs jinoiy javobgarlikka tortilgan.
Sud yakunlari bo‘yicha korrupsiyaga oid jinoyat ishlari bo‘yicha 592,5 milliard so‘mlik moddiy zarar yetkazilgani aniqlanib, shundan 170,8 milliard so‘mi yoki (28 foiz) undirilib, 421,7 milliard so‘m Bosh prokuratura huzuridagi Majburiy ijro byurosi tomonidan undirilishi belgilangan.
Jinoiy javobgarlikka tortilgan shaxslar hududlar kesimida quyidagicha:
- 245 ta Toshkent viloyati,
- 173 ta Samarqand viloyati,
- 170 ta Jizzax viloyati,
- 130 ta Surxondaryo viloyati,
- 152 ta Farg‘ona viloyati,
- 109 ta Namangan viloyati,
- 100 ta Andijon viloyati,
- 95 ta Qashqadaryo viloyati,
- 85 ta Sirdaryo viloyati,
- 79 ta Xorazm viloyati,
- 78 ta Toshkent shahri,
- 78 ta Qoraqalpog‘iston Respublikasi,
- 51 ta Navoiy viloyati,
- 19 ta Buxoro viloyatida mansabdorlik jinoyatlari qayd etilgan.
Ma’lumot uchun, O‘zbekistonda 2020-yilda 1723 nafar mansabdor shaxs jinoiy javobgarlikka tortilgan edi.
