2021-yilda Toshkentning yo‘l infratuzilmasi va ichki markaziy ko‘chalarini ta’mirlashga 467,3 milliard so‘m yo‘naltiriladi, deb xabar beradi “Podrobno”.

Foto: “Daryo” / Madina Nurman

Ma’lumotlarga ko‘ra, bevosita yo‘l qoplamalarini ta’mirlashga 221,6 milliard so‘m (uning 74,7 milliardi — davlat, 146,9 milliard — mahalliy budjetdan) ajratiladi. Amalga oshiriladigan ishlar dasturidan shahardagi 155 ta mahalladan o‘tuvchi 68 ta markaziy va 269 ta ichki yo‘l o‘rin olgan.

Toshkent shahar hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari Baxtiyor Rahmonovning ma’lum qilishicha, asosiy e’tibor ichki yo‘llarni ta’mirlashga qaratiladi.

“So‘nggi o‘n yildan buyon ushbu yo‘llarga hech kim e’tibor qaratmadi. Ularga qo‘l tegmadi, mablag‘ yo‘q edi. Joriy yilda esa ajratilgan mablag‘larning 60 foizga yaqini ichki yo‘llarni asfaltlashga ketadi. Tabiiyki, markaziy yo‘llarga ham, misol uchun, Farg‘ona yo‘li. Bekatlar o‘zgaradi, ular do‘konsiz bo‘ladi, faqat yo‘lovchilar uchun mo‘ljallanadi, umuman infratuzilma o‘zgaradi”, — deydi Rahmonov.

Shuningdek, hokim o‘rinbosarining qo‘shimcha qilishicha, hozirda yangi texnologiyalardan foydalangan holda ikkita ko‘prik qurilmoqda. “Bu kabi ko‘priklardan shaharda 20 tacha bo‘ladi. Ularning narxi har biri uchun 2,5 milliard so‘mdan ortiq”, — deydi u.

Bundan tashqari, Baxtiyor Rahmonov bir kilometr yo‘lni ta’mirlash qanchaga tushishi va u qancha vaqt xizmat qilishi borasidagi savolga ham javob bergan.

“Kesimlar jihatidan olinadigan bo‘lsa, magistral, markaziy va ichki ko‘chalar mavjud. Har birining ‘masallig‘i’ o‘zgacha. Ular sheben, shag‘al, qum zarralari va hokazolardan tarkib topgan. Halqa yo‘lining bir kilometri o‘rtacha 1 million dollar turadi. 65 mingdan 100 ming dollargacha — ta’mirlash, asfalt qoplamalari. Xizmat qilish muddati — 15 yildan kam emas”, — deydi poytaxt hokimi o‘rinbosari.

Eslatib o‘tamiz, 2020-yilda Toshkent yo‘llarini yaxshilashga salkam 493 milliard so‘m yo‘naltirilgan. Xususan, yil davomida jami uzunligi 111,6 kilometr bo‘lgan 318 ta ko‘chalarda qurilish, mukammal va joriy ta’mirlash ishlari olib borilgan.