Toyota компанияси янги ёнилғи элементлари имкониятлари намойиш этилган видеоролик билан бўлишди. Марка мутахассислари 1:10 масштабда ўйинчоқ Toyota Mirai’ни ҳақиқий автомобиль аниқлигида ясаган. Бироқ япон муҳандисларига визуал ўхшашлик етарли бўлмаган, шу сабабли улар митти нусхага водородли ёнилғи элементларидаги двигателни ҳам ўрнатишга қарор қилган, деб хабар беради Motor.
Кадр: YouTube
Toyota мутахассислари ноодатий лойиҳа юзасидан водородли ёнилғи элементларини ишлаб чиқишга ихтисослашган Британиянинг Bramble Energy технологик компаниясига мурожаат қилган. Ҳамкорликдаги иш натижасида экспертлар митти двигателни яратган ва уни радиобошқарилувчи модель шассисига ўрнатишга муваффақ бўлган. Ўйинчоқ Mirai водород учун АА типидаги оддий батареяларни ёдга солувчи иккита бакка, босма плата асосидаги ёнилғи ячейкаси (Printed Circuit Board Fueл Cell) ва тортувчи батареяга эга бўлган.
Ихтирочиларнинг сўзларига кўра, водородли ёнилғи элементларидан фойдаланиш митти Toyota’дан фойдаланиш вақтини оддий батареялар билан таққослаганда икки баробарга ошириш имконини беради. Компания вакиллари двигатель ва ўйинчоқ Mirai’нинг максимал тезлиги бўйича маълумотларни ошкор этмаган бўлса-да, моделнинг чиқувчи қуввати 20 ватт атрофида.
Радиобошқарилувчи машинада водородли ячейкалардан фойдаланиш имконияти компаниянинг ёнилғи элементларидан классик автомобиль соҳасидан ташқарида ҳам қўллай олишини намойиш этган.
Оддий Toyota Mirai 182 от кучига эга электромотор, ёнилғи элементларидаги электрокимёвий генератор ва ҳар бирида 5,6 килограмм водород сақланадиган учта баллон билан жизоҳланган. Mirai бир марта ёнилғи қуйиш орқали 860 километр йўл боса олади.
Аввалроқ Toyota Mirai водородомобили ёнилғи элементларида ҳаракатланадиган электромобиллар ўртасида бир марта қувватланиш орқали узоқ масофа босиб ўтиш бўйича рекорд ўрнатгани тўғрисида хабар берилганди.
