Porsche компанияси 3D принтер ёрдамида тайёрланган автомобиль ўриндиқлари савдосини йўлга қўйди. Синовчи-ҳайдовчилар билан амалга оширилган қатор тестлардан сўнг, ўриндиқлар Porsche Теquipment’нинг Performance Parts каталогига киритилган. Ҳозирда унинг Boxster, Cayman ва 911 учун турли версиялари мавжуд, деб хабар беради Motor.
Ўриндиқларнинг асосий ўзига хослиги — марказий қисми, ёстиқча ва суянчиғи 3D принтер ёрдамида тайёрланган. Ўриндиқлар худди профессионал автоспортдаги каби ҳайдовчининг хоҳишига қараб мослашиши учун ушбу элементлар уч даражадаги қаттиқликка эга. Porsche’нинг синовчи-ҳайдовчиси Ларс Керннинг таъкидлашича, эргономика ва қўллаб-қувватлаш нуқтаи назаридан у ростдан ҳам пойга автомобиллари «ковши»га яқин ҳисобланади.
Ўриндиқ асосини кўпикли полипропилен (EPP) ташкил этади, юқори қисми 3D принтерда полиуретан асосли материал қотишмасидан босиб чиқарилган. Қатламлар елимдан фойдаланилмаган ҳолда бирлаштирилади. Ташқи қопламаси сирпанмайдиган Race-Тех материалларидан ишланган. Porsche’дагиларнинг сўзларига кўра, бу каби ўриндиқ оддийсидан саккиз фоизга енгилроқ.
Ҳозирда ўриндиқлар уч хил рангда тақдим этилмоқда — қора, қизил ва сариқ, 2022 йилнинг февралидан бошлаб Arctic Грэй кул ранги ҳамда Ultramarine ва Shark Blue кўк ранглари қўшилади. Янги ўриндиқ Porsche’нинг ковшсимон креслолар билан жиҳозланган барча моделларига мос келади, хусусан, ҳам ҳайдовчи, ҳам олд йўловчи жойи учун. Бу каби «чоп этилган» битта ўриндиқнинг нархи 2677,5 еврони ташкил этади ва уни Porsche марказларида бир неча дақиқа ичида алмаштириш мумкин.
Аввалроқ АҚШда 3D принтер ёрдамида ноёб электровелосипед яратилгани, Хитойда «Формула-1» болидининг ишлайдиган узатмалар қутиси 3D принтер ёрдамида чоп этилгани тўғрисида хабар берилганди.
Изоҳ (0)