Interpolning O‘zbekistondagi Milliy markaziy byurosi katta miqdordagi firibgarlikda ayblangan ikki shaxs Janubiy Koreyadan O‘zbekistonga ekstraditsiya qilinganini ma’lum qildi.
Qayd etilishicha, 2021-yilning oktabr oyida Janubiy Koreyaning Seul shahrida O‘zbekistondagi Interpol Milliy markaziy byurosi, Toshkent viloyati Ichki ishlar bosh boshqarmasi va Janubiy Koreyaning Interpol MMB xodimlarining hamkorlikdagi tezkor qidiruv tadbirlari o‘tkazilgan.
Ushbu tadbirlar natijasida respublika huquq-tartibot idoralari tomonidan O‘zbekiston Jinoyat kodeksining 169-moddasi (o‘g‘rilik) 2-qismi, 168-moddasi (firibgarlik) 2-qismi bilan belgilangan og‘ir jinoyatlarni sodir etgani uchun respublika huquqni muhofaza qilish organlari tomonidan xalqaro miqyosda qidiruvda bo‘lgan 30 yoshli shaxs qo‘lga olingan.
Olingan ma’lumotlarga asosan, Seulda xizmat safarida bo‘lgan, katta miqdordagi firibgarlik jinoyatini sodir etgani uchun qidiruvda bo‘lgan yana bir O‘zbekiston fuqarosi — 64 yoshli J.N. qo‘lga olingan. U 2016-yilda fuqarolar ishonchiga kirib, aldov yo‘li bilan Toshkent shahridan ko‘chmas mulk xaridida yordam berishini va’da qilib, ulardan olgan pullarni o‘z ehtiyojlari uchun sarflab yuborgan.
“Bugungi kunda muzokaralar va O‘zbekistondagi Interpolning MMB hamda Toshkent viloyati IIBB JQB xodimlarining hamkorlikdagi tezkor harakatlari tufayli qidiruvdagi ikkala shaxs ham qo‘lga olinib, O‘zbekiston Respublikasiga topshirildi va endi ular qilmishlari uchun sudda javob beradi”, — deyiladi xabarda.
Eslatib o‘tamiz, 2021-yilning fevralida Rossiya Bosh prokuraturasi mulkka qarshi jinoyatlar va giyohvand moddalar savdosida ayblanayotgan 10 nafar O‘zbekiston fuqarosini jinoiy javobgarlikka tortish uchun O‘zbekistonning vakolatli organlariga topshirgandi. Sentabr oyida O‘zbekiston hududida jinoyat sodir etgan yana 4 nafar fuqaro Rossiyadan ekstraditsiya qilindi.
Izoh (0)