Британияда коронавируснинг дельта штаммдан ҳам юқумлироқ янги тури тарқалмоқда. У Исроилда ҳам аниқланди

Буюк Британияда машҳур дельта штаммининг янги варианти — AY.4.2 тарқалмоқда, деб ёзади «РБК» Financial Times газетасига таяниб.

Ушбу мутация «ҳиндча» штаммга нисбатан 10—15 фоизга юқумлироқ бўлиши мумкин, дея огоҳлантирди Кембриждаги Сенгер институти ҳамда Лондон университет коллежининг Генетика институти мутахассислари.

Уларнинг сўзларига кўра, Буюк Британияда аниқланган барча касалланиш ҳолатларининг қарийб 10 фоизини янги вариант ташкил қилмоқда. У фаол равишда тарқалмоқда, аммо бу жараён йил бошида Ҳиндистондан олиб келинган дельта вариантга нисбатан секинроқ кечмоқда.

Исроилда ҳам коронавируснинг ушбу янги вариантига чалиниш билан боғлиқ биринчи ҳолат қайд этилди.

«Бугун Исроилда AY.4.2 варианти аниқланди, у Европанинг бир нечта мамлакатларида қайд этилганди», — дейилади мамлакат Соғлиқни сақлаш вазирлиги хабарида.

Касалланган одам чет элдан қайтиб келган вояга етмаган шахс бўлиб, Бен-Гурион аэропортида тестдан ўтказилганда маълум бўлган.

Коронавируснинг дельта варианти 2020 йилнинг октябрида Ҳиндистонда топилган. ЖССТ маълумотларига кўра, ушбу штамм июнь ойи ўрталарига келиб 90 дан ортиқ мамлакатда қайд этилган. Юқумлилик даражасининг юқори экани ва чекловларнинг бир қисмидан воз кечиш унинг кенг тарқалишига сабаб бўлди. Ташкилот мутахассиси Мария ван Керкховенинг таъкидлашича, дастлабки маълумотларга кўра дельта варианти касалликнинг оғир кечиши хавфини оширади. Бироқ янги штаммнинг бошқаларига қараганда кўпроқ ўлимга сабаб бўлиши ҳақида далиллар йўқ.

Июнь ойида Ҳиндистонда коронавирус «ҳиндча» штаммининг янги варианти тарқалди. Махараштра штатида аниқланган ушбу тур дельта-плюс деб номланди. Ҳиндистон Соғлиқни сақлаш вазирлиги аҳоли зич жойлашган Махараштра, Керала ва Мадхя-Прадеш штатлари ҳокимиятларини дельта-плюс хавфидан огоҳлантирди. Мутахассислар фикрига кўра, дельта-плюс ўта юқумли бўлиб, ҳатто унинг ташувчиси ёнидан ниқобсиз ўтиб кетиш ҳам хавфли.