Ўзбекистонга илк бор кўчма мобил ПЗР лабораторияси олиб келинди, деб хабар беради ССВ матбуот хизмати. У бир суткада 1,5 минг кишида коронавирусга ПЗР текширувини амалга ошириш имконини беради.
Кўчма мобил лаборатория 2020 йилда Германия халқаро ҳамкорлик жамияти ва OPASCA GmbH кўмагидаги «Германия ҳукуматининг Ўзбекистон соғлиқни сақлаш тизимига техник ва ташкилий ёрдами» лойиҳаси доирасида мамлакатга келтирилган.
«Ҳозирги кунда мамлакатимизнинг турли ҳудудларида 200 га яқин турғун ПЗР лабораториялари мавжуд. Аммо бу чекка ва олис ҳудудлар аҳолисини тўлиқ қамраб олишда баъзи муаммоларни юзага келтираётганди. Шу боис бугун келтирилган кўчма мобил ПЗР лабораторияси ва эмлаш пункти юртимизнинг исталган ҳудудига бориб, коронавирус таҳлилларини ўтказиш имконини беради. Яна бир аҳамиятли жиҳати, мазкур замонавий техника воситалари ёрдамида ПЗР тести натижаларини 1 соат муддатда олиш мумкин», — дейди Республика Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев.
Таъкидланишича, ушбу лаборатория электр энергияси бўлмаган вазиятларда ҳам 6 соатгача хизмат кўрсата олади. Ҳайдовчи ва 3 нафар тиббиёт ходими фаолияти учун тўлиқ мослаштирилган. Уларнинг дам олиши, овқатланиши, ювиниши ва бошқа эҳтиёжлари учун зарур шароитларга эга.
Мобил ПЗР лабораторияси дастлабки фаолиятини Самарқанд вилоятининг чекка ва аҳоли сони кўп бўлган ҳудудларидан бошлаши кутилмоқда. Фуқаролар мазкур лабораторияда коронавирусга бепул тест топширади.
Изоҳ (0)