Microsoft kompaniyasi o‘zining birinchi o‘yin pristavkasini taqdim etganiga 20 yil to‘lganini nishonlamoqda. Shu munosabat bilan kompaniya Xbox kontrolleri va garniturasining yubiley versiyalarini taqdim etdi, deb xabar beradi “Afisha.uz”.
Ma’lumot uchun, original Xbox birinchi bor 2001-yilning 15-noyabrida sotuvga chiqqan.
Birinchi yangilik — 20th Anniversary Special Edition Xbox Wireless Controller nomli shaffof kontrolleri. Kompaniyadagilarning ma’lum qilishicha, yarim shaffof “vstavka”li kontroller dizaynini yaratishda dasturchilar uchun mo‘ljallangan original Xbox Debug’dan ilhomlanilgan. Shaffof panel orqali kumush rangli ichki komponentlarni ko‘rish mumkin.
Kontrollerning ushlagich qismi, gibrid “krestovina” va Xbox tugmasi yashil rangga bo‘yalgan. Bu kabi dizayn orqali birinchi Xbox logotipiga shama qilinadi.
Microsoft hozirda 20th Anniversary Special Edition Xbox Wireless Controller uchun buyurtmalarni qabul qilmoqda.
Xbox 15-noyabrdan sotuvga chiqadi va uning AQShdagi narxi 70 dollardan boshlanadi.
Xbox yubileyi munosabati bilan taqdim etilgan ikkinchi yangilik — Xbox Stereo Headset garniturasi. U ham yorqin yashil elementlar bilan birga yarim shaffof korpusga ega bo‘lgan. Mazkur naushnik narxi ham 70 dollarni tashkil etadi.
Eslatib o‘tamiz, 2021-yilning martida Sony kompaniyasi o‘zining PlayStation 5 pristavkasi uchun sharsimon ko‘rinishdagi qator imkoniyatlarga, jumladan, sensorli aniqlash tizimiga ega kontrollerni taqdim etgandi.
Izoh (0)