Samsung компанияси букланувчан экранга эга флагман смартфонининг янги авлоди — W22 5G 13 октябрь куни Ханчжоу Катта театрида тақдим этилишини маълум қилди, деб ёзади IXBT.
Samsung W серияси Galaxy S ва Galaxy Note серияларидан кўра юқори синфга кирувчи флагман маҳсулотлар ҳисобланади. У Samsung ва China Telecom томонидан яратилган «Дунё юраги» замонавий флагманлар сериясига киради. Орқа қисмидан «Дунё юраги» логотипи ўрин олади. Маълум қилинишича, Samsung W22 5G модели iPhone 13 Pro Max’дан қимматроқ нархда сотувга чиқади.
Samsung W20 дан бошлаб W сериясига кирувчи смартфонлар Galaxy Fold линейкасининг модификация қилинган версиялари ҳисобланади. Samsung W22 5G ҳам бундан четда қолмайди. Аввалроқ тақдим этилган тасвирларга кўра, Samsung W22 5G смартфони Samsung Z Fold 3 асосида яратилган, яъни 7,6 дюймли экранга эга бўлган.
Телефон Qualcomm Snapdragon 888 процессори, 16 гигабайт тезкор ва 512 гигабайт ички хотирада ишлайди. Қурилма нархи 3100 доллардан қиммат бўлиши айтилмоқда. Таъкидлаш керакки, iPhone 13 Pro Max нархи 1099 доллардан бошланади.
Аввалроқ Samsung ўзининг Galaxy М52 — автономлик бўйича «махлуқи»ни 365 доллардан сотувга чиқариши, Galaxy S22 модели Samsung’нинг энг кичик флагманига айланиши тўғрисида хабар берилганди.
Изоҳ (0)