Cobalt ва Nexia Қозоғистонда энг кўп сотилган автомобилларга айланди

2021 йилнинг январь—сентябрь ойлари натижаларига кўра, Chevrolet’нинг икки модели — Cobalt ва Nexia Қозоғистонда энг кўп сотилаётган автомобиллар бўлиб қолмоқда. Ушбу давр мобайнида 79 444 дона автомобиль сотилган. Бу ҳақда Қозоғистон автомобиль бизнеси ассоциациясига (АКАБ) таяниб, UzAuto Motors хабар берди.

Маълум қилинишича, Cobalt ва Nexia автомобиль моделлари мамлакатдаги сотув лидерларига айланган. Ушбу моделлар умумий ҳисобда 22 383 дона сотилган бўлиб, бозордаги улуши, тахминан, 28,17 фоизни ташкил этади. Қозоғистонликлар 10 769 дона Cobalt, 9112 дона Nexia харид қилган. Учинчи ўринни 7502 та сотув кўрсаткичи билан Hyundai Accent эгаллаган.

Таъкидланишича, Қозоғистонда 2020 йилга нисбатан UzAuto Motors автомобиллари сотуви 5 баробарга ошган.

«Шу билан бирга, Қозоғистонда ушбу моделлар бизнинг мамлакатдагидан кўра тахминан 1000 долларга қиммат. Умуман олганда АКАБ ушбу давр мобайнида енгил автомобилларнинг бозордаги оптимал ўсишини таъкидлади. 2020 йилга нисбатан ўсиш 36,3 фоиз билан сақланди», — дейилади хабарда.

Эслатиб ўтамиз, Cobalt 2021 йилнинг мартида Қозоғистондаги автомобиль савдолари бўйича биринчи ўринни эгаллаганди. UzAuto Motors биринчи ярим йилликдаги экспортининг 94 фоиз ушбу мамлакатга кетган, экспортнинг ўзи ишлаб чиқаришнинг қисқариши фонида икки баробар ошган — худди UzAuto Motors’нинг соф фойдаси каби.

Шу билан бирга, Spot’нинг ёзишича, Ўзбекистоннинг ўзида Cobalt моделини харид қилишга узун навбат давом этмоқда. Август охири — сентябрь бошларида Cobalt хариди учун навбатда турганлар сони 11,6 минг кишидан ошган, ҳозирда эса «Ўзавтосаноат» ботига кўра — 9311 та.