Жиззах вилоятининг Шароф Рашидов туманида истеъмолга яроқсиз гўшт маҳсулотларини Тошкент вилоятига жўнатиб турган шахслар аниқланди. Бу ҳақда «Ёшлар» телеканалининг «Янги давр» информацион дастурида маълум қилинди.
Маълумотларга кўра, фуқароларнинг мурожаатлари асосида Жиззах вилояти Экология ва атроф-муҳитни муҳофаза қилиш бошқармаси ходимлари томонидан Шароф Рашидов туманидаги хонадонлардан бири ўрганилган.
Ўрганишлар давомида туманнинг «Эски тошкентлик» МФЙ Нурафшон кўчасида яшовчи икки нафар фуқаро ўзининг ҳовлисида санитария-гигиена талабларига зид равишда қўй ва молларнинг ичаклари, қатқорни ҳамда ҳар хил гўштларни ювиб, тузлаб, Тошкент вилоятига етказиб бериш билан шуғулланиши аниқланган.
Шунингдек, улар чорва ва қорамолларни сўйиш натижасида ҳосил бўлган чиқиндиларни белгиланмаган жойларга ташлагани маълум бўлган.
Ҳолат юзасидан мазкур шахсларнинг ҳар бирига нисбатан Маъмурий жавобгарлик тўғрисидаги кодекснинг 91-моддаси 3-қисми (чиқиндилар билан боғлиқ ишларни амалга ошириш соҳасида дастлабки ҳисобга олиш ва назорат қилиш, шунингдек, чиқиндиларни кўмиш ва утилизация қилиш жойлари бўйича кадастр ахборотларини тақдим этиш тартибини бузиш) билан БҲМнинг 5 баробари (1,35 миллион сўм) миқдорида жарималар қўлланилган.
Аввалроқ Навоийда 160 кг гўшт ветеринария-санитария талабларига зид равишда Тошкентга олиб кетилаётгани аниқлангани, Қашқадарёда уйида эшакларни сўйиб сотиш билан шуғулланган шахсга суд ҳукми ўқилгани тўғрисида хабар берилганди.
Изоҳ (0)