Голливуднинг энг талабгир ва келишган вакилларидан бири ҳисобланган Хью Жекман 12 октябрь куни 53 ёшга тўлди. Шу муносабат билан актёр билан боғлиқ маълумотларни эътиборингизга ҳавола қиламиз.
Болалигидан уятчанлик нима эканлигини билмаган
Хью оиладаги бешинчи, энг кенжа фарзанд. Киришимли бўлишига иккитадан ака ва опаси билан биргаликда улғайгани сабаб бўлган. Болалигиданоқ эътибор марказида бўлгани туфайли кейинчалик саҳнада чиқиш қилишдан чўчимаган. Олти ёшида мусиқий гуруҳ таркибида чиққан Хью ўша вақтда ҳаммадан яхшироқ куйламаган бўлса ҳам ўзига бўлган ишончи юқори бўлган. Мактабга боришни бошлаганидан кейин эса театрда иштирок этиш, муҳим тадбирларда нутқ сўзлашга таклифлар бисёр бўлган. Дарҳақиқат завқ бағишлагани учун у ҳеч ҳам бу таклифларни рад қилмаган.
Онаси ташлаб кетган
Етти ёшга тўлганида ота-онаси ажралиб ўз йўлидан кетишни афзал билган. Онаси қизларини олиб Англияга жўнаб кетган, ўғиллар эса отаси билан Австралияда қолган. «Бир куни мактабдан келиб не кўз билан кўрайки, онам йўқ. Шундан кейин мен уйга қайтишдан қўрқиб қолганман. Машғулотдан қайтиб, зинада акаларимни кутиб ўтирганман. Онамнинг бир кунмас бир кун қайтишига ишонганман. Унинг Англияга кетгани, турмушга чиққани ва фарзандли бўлганини билсам ҳам, ўша умид билан 5 йилни ўтказганман. Кейинроқ отам у билан ярашишга уриниб кўриш учун Европага жўнаб кетган ва бир неча кундан кейин шашти тушиб қайтиб келган. Ана шундагина онам бизни бутунлай тарк этганини тушуниб етганман ва бу менинг жаҳлимни чиқарган. Бошқа томондан қараганда, мен болалигимдан салбий эмоцияларимни яширишни, ўзимни бошқа инсонлар ўрнига қўйиб кўришни ўрганганман. Онамнинг туғруқдан кейинги оғир депрессияни бошдан кечирганини тушуниб етганман. У бир неча марта шифохонада даволанган, Австралияга кўчиб ўтиш ҳам у учун осон бўлмаган. Шу сабаб ҳам уни ҳеч нимада айблай олмайман.
Шоуга чипта олиш учун овқатидан пул тежаган
Ёш Жекман илк марта ота-онасисиз якка ўзи Дэвид Боуининг шоусига бормоқчи бўлган. Бунинг учун алоҳида пул сўрамасдан, отаси овқатланишга берган маблағни тўплаган. Ярим йилда 20 доллар жамлаган йигитчага синфдоши арзонроқ чипта таклиф қилиб қолган. Бу эса табиийки унга ёқиб тушган. Орадан 30 йил ўтиб эса бу воқеа ҳақида Боуига айтиб берган.
Хью мактабни битиргач, Сиднейдаги технология университетининг журналистика факультетига қабул қилинган. Аммо кейинроқ ўзини бу соҳада кўрмаган. Иш излаш мавриди келганида тўғри келадиган жойни топа олмайман, деган қўрқув пайдо бўлган. Журналистика осон эмаслиги ҳақидаги фикрларни эшитганидан кейин эса танаффус олиб, драма мактабига қатнай бошлаган. Актёр бунинг ҳаммаси унга катта тажриба бўлганини таъкидлайди. «Мен ОАВ ходимлари билан мулоқот қилишни яхши кўраман. Бу гўё шахмат ва шашка ўйинига ўхшайди. Ҳамиша мендан қандай жавоб кутаётганларини, қайси саволни бош муҳаррир сўраттираётганини билиб тураман».
Тинимсиз ишлашга аҳд
Актёр бўлишини тушуниб етганидан кейин Жекман тинимсиз ишлашга қарор қилган. У фаолият соҳасида энг яхши бўлиш учун кейинги 5 йил давомида байрам ва дам олиш кунларисиз ишлаши кераклигини англаган. Актёрликка ўқиб, керакли одамлар билан танишган Жекман бир вақтнинг ўзида ёнилғи қуйиш шохобчаси ва фитнесс-клубларда ишлаган. Масхарабоз кийимида болаларни кулдириш, ресторанда хизмат қилиш ҳам унга бегона бўлмаган. «Ҳаммасидан ҳам кўпроқ орадан 20 йил ўтиб, киностудия остонасида ўралашадиган омадсиз бўлиб қолишдан қўрққанман. Шундай бўлмаслиги учун ҳам жонимни жабборга бериб ишлаганман», — деган актёр.
Суперқаҳрамон бўлишни истамаган
Аслида «Ғаройиб одамлар»даги Росомаха ролига кастинг якунидан кейин Дюгрей Скотт таклиф қилинган. Бошқа лойиҳа билан банд бўлган Дюгрей продюсерларга рол учун Хью маъқул келиши мумкинлигини айтган. «Мен суперқаҳрамонга айланишни асло истамаганман. Рафиқам ҳам фикримга қўшилган. Аммо танишлар бундай қаҳрамонни гавдалантиришдан бош тортсам, эрта ёки кеч ночорликда вафот этишимни айтишган. Биринчидан ўша вақт аллақачон 30 ёш бўлганман, иккинчидан эса муваффақиятли карьера учун блокбастер, жанговар фильмлар сув ва ҳаводек зарур. Улар ёрдамида исмингни танит, кейин эса исталган ролингни танла, деб маслаҳат беришган ва мен рози бўлганман».
Росомахани гавдалантириш осон бўлмаган
«Ғаройиб одамлар»да Хьюнинг жисмоний кўриниши аъло даражада бўлган, аммо асли ориқ бўлгани сабаб бундай кўринишга эришиш осон бўлмаган. Бир ўтиришда оқсил бисёр бўлган таомдан 8 порция еган, спорт залдан эса кун давомида чиқмаган.
Салбий қаҳрамонлар жону дили
«Энг қизиғи, ёмон қаҳрамонга айланиш. Фикримча, ҳаммаси номутаносибликда: ҳаётда мен жуда ҳам мулойим одамман ва ҳеч кимга қўполлик қилмайман — мени шундай тарбиялашган. Афтидан, шу сабаб ҳам менга шундай қаҳрамонларни ижро қилиш ёқади. Мюзикллардан бирида ёвуз қаҳрамон ролини ўйнаганман. Саҳна ортига ўтганимда томошабинлар ғазаб билан ортимдан норозилик билдирган. Уларни актёр эмас, салбий қаҳрамон ғазаблантирганидан эса фахрланганман. Норозиликлари эса мен ролни қойиллатганимга яққол мисол бўлади».
Медитация қилишни канда қилмайди
Агар имкон тополса, Хью кунига 2 марта 30 дақиқадан медитация қилади. «Бу дақиқаларда мен Хью Жекман, актёр ёки турмуш ўртоқ ва ота бўлмай қоламан. Мен коинотнинг бир қисми бўлиб, унинг куч-қудратини ҳис қиламан. Шунга қарамай таъкидлашим жоизки, медитация ҳеч бир динга тааллуқли эмас. Мен шунчаки барча ғубор ва муаммоларни шу орқали чиқариб юбораман. Ахир мени камера қаршисида ўзимни ноқулай ҳис қилишимни ҳеч ким билмайди. Саҳнада мен гўё сувдаги балиқдекман, аммо кинода ҳаммаси бошқачароқ. «Хўрланганлар» (Les Мiсérаbles) фильмининг суратга олиш жараёнида психолог ёрдамидан фойдаланган вақтларим ҳам бўлган. Шу сабаб ҳам медитация мен учун жуда муҳим».
Таом тайёрлашни яхши кўради
Ҳаммада дам олиш ҳақида турли тушунча бор, Жекман ҳам бундан мустасно эмас. «Менга фаол дам олиш, сузиш, велосипед ҳайдаш жуда ҳам ёқади. Кейин эса китоб ўқиб, чўзилиб ётса ҳам бўлади. Айтсам ишонмайсиз, таом тайёрлаш менга жуда ҳам ёқади. Айниқса, нон, турли булочкалар тайёрлашни хуш кўраман, қолаверса, кўп рецептларни ҳам биламан. Шунингдек, ҳеч қаерга шошмасдан, рафиқам билан суҳбат қуришни, болаларим ва дўстлар билан мулоқотни яхши кўраман». Жекмандаги таом тайёрлашга бўлган қизиқиш болалигидаёқ пайдо бўлган. Ошпаз бўлишни орзу қолган ёш Хью самолёт бортида овқат пишириб кўрмоқчи бўлган.
Стрессли вазиятлар унга чўт эмас
Хавф ва ноқулайликлар «жаноб Росомаха» учун одатий ҳол. Актёр стресс унга янада яхши бўлишга туртки бўлишини таъкидлайди. «Мактаб давримда мени дангаса деб ҳисоблаган айрим ўқитувчилар имтиҳондан йиқитиш билан таҳдид қиларди. Аммо уч соат китобдан бошимни кўтармаганимдан кейин синфдошларимдан ўтиб кетиб, текширувчилар олдида ҳақиқий шоу кўрсатганман. Вазият сабаб бурчакка суқилиб қолганимда яхшироқ ишлайман чоғи. Таъкидлаш жоизки, мендаги бу хусусият йиллар ўтгани сайин кучайиб бормоқда. Шундай экан, муаммоли ва қийин вазиятлар мени қўрқитмайди, аксинча жуда яхши ёрдам беради».
Рафиқаси билан ҳамиша бирга
Актёр рафиқаси ҳақида илиқ фикрлар билдиришдан чарчамайди. «Деб билан учрашиб қолган кунимизни ҳеч қачон унутмайман. Бу вақтда оғриқли муносабатларга нуқта қўйгандим, унинг ҳам ҳаётида ҳеч ким бўлмаган. Аммо гап бунда эмас — у менга ёқишга ҳаракат қилмаган, мен эса ўлгудек севиб қолгандим. У нақадар гўзал, табиий ва энергияга тўла бўлганди… Ундан 13 ёш кичиклигим сабаб масофа сақлашга ҳаракат қилган. Бироқ кейинчалик ёш буткул аҳамиятсиз бўлиб қолган. Мен икки ҳафта ўтиб унга турмуш қуришни таклиф қилишга тайёр эдим, аммо Деб ярим йилдан кейингина розилик берган. Кези келганда унинг онасига раҳмат айтишим керак, чунки айнан у Дебини кўндиришга ёрдам берган». Жуфтлик бугунги кунда икки нафар фарзанднинг ота-онаси. Ўғли Оскар 2000 йилда, қизи Ава эса 2005 йил туғилган.
Айнан рафиқаси унга саратонни енгишга ёрдам берган
Бундан 7 йил аввал Деборра турмуш ўртоғининг бурнида ғалати шиш борлигини пайқаган, Хью бу кичик нарсага эътибор ҳам бермаган. Рафиқасининг мажбурлаши билан кўрикдан ўтган актёрда базал ҳужайрали карцинома, соддароқ айтганда, тери саратони борлиги аниқланган. Жарроҳлик амалиёти ва кимёвий муолажалар ўтказилган. Аммо бир неча йиллардан кейин касаллик қайта такрорланган. Актёр умумий ҳисобда олти марта операция бўлган. Шу билан бирга у суратга олиш жараёнларида узилиш бўлмаслигига ҳаракат қилган.
Росомаха билан хайрлашиш
Росомаха ижроси сабаб Жекманнинг исми энг узоқ вақт давомида суперқаҳрамонни гавдалантирган актёр сифатида Гиннеснинг рекордлар китобидан ўрин олган. У 16 йил ва 228 кун давомида Росомаха қаҳрамони билан айрилмаган. Аммо ҳамма нарсанинг ниҳояси сингари бунинг ҳам охири бўлган. Хью Жекман «Логан» номли фильмда сўнгги бор Росомахани гавдалантирган. «Бу франшиза карьера қуришим учун менга тамал тоши бўлди. У менга кўп эшикларни очди, исмимни танитди. Аммо «Логан» билан хайрлашганим учун ғам чекмадим. Шунчаки енгил меланхолия бор холос. Мен ушбу қаҳрамонни бағоят яхши кўраман, аммо уни саноқсиз гавдалантиришнинг имкони менда йўқ. Қолаверса, олдинда узоқ кутилган таътил — мен йилни ишсизлардек ўтказишни истайман ва бу жуда ажойиб», — деган у.
Изоҳ (0)