Вашингтон полицияси Голливуд актёри Вуди Харрельсонга «Уотергейт» меҳмонхонаси томида ҳужум қилган сураткашга айблов эълон қилади, деб хабар беради Esquire.
Кўнгилсиз ҳодиса 6 октябрь куни маҳаллий вақти билан соат 23:00 ларда содир бўлган. Харрельсон маст ҳолда бўлган эркакдан ўзи ва қизини суратга олишни тўхтатишни, шунингдек, олинган суратларни ўчиришни сўраган. Актёрнинг сўзларига кўра, бунга жавобан сураткаш унга ҳужум қилиб, «бўйнини бўғишга уринган». Шунда Харрельсон эркакни урган. Гувоҳлар ҳам актёрнинг версиясини тасдиқлаган.
Харрельсоннинг хатти-ҳаракати полициячилар томонидан ўзини ҳимоя қилиш дея баҳоланган. Сураткаш меҳмонхонада сўроқ қилинган бўлиб, унинг исми айблов эълон қилингач ошкор этилади.
Вуди Харрельсон бунга қадар ҳам бир неча бор сураткашлар билан муштлашувларда иштирок этган. Охирги можаро 1995 йили Мартас-Виньярд оролида содир бўлган. Суднинг қарорига кўра, актёр «оиласини таъқиб қилган»и айтилган сураткашларга компенсация тўлаши керак бўлган.
Шунингдек, 2006 йилда ҳам Голливудда юзага келган можародан кейин даъво киритилган бўлиб, Харрельсон вазиятни судга қадар ҳал этган. Уч йилдан сўнг у Ла-Гуардия аэропортида ню-ёрклик сураткаш билан жанжаллашиб қолган.
Изоҳ (0)