Samsung kompaniyasi o‘rta budjetli yangi smartfoni — Galaxy M52’ni namoyish etdi. Yangi model kompaniyaning boshqa smartfonlariga qaraganda uzoq vaqt ishlay oladigan akkumulyatorga ega bo‘lgani bilan ajralib turadi, deb xabar beradi “Afisha.uz”.
Foto: “Afisha.uz”
Galaxy M52 modeli piksellar nisbati 2400x1080 bo‘lgan, 120 gertsli tasvir yangilanish chastotasiga ega 6,7 dyuymli Super AMOLED+ ekran bilan jihozlangan. Displey Gorilla Glass 5 shishasi bilan qoplangan, barmoq izi skaneri esa yon tomondagi o‘chirib-yoqish tugmasida joylashgan.
Smartfonning 32 megapikselli frontal kamerasi ekran markazidagi teshikdan o‘rin olgan. Shuningdek, qurilmaning 64 megapikselli asosiy, 12 megapikselli ultra keng burchak va 5 megapikselli makro modullari ham bor. Smartfon Dolby Atmos va LDAC kodekini qo‘llab-quvvatlaydi. Apparat ichidan Snapdragon 778G protsessori, 6/8 gigabayt tezkor va 128 gigabayt ichki xotira o‘rin oladi. Ichki xotirani 1 terabaytli microSD yordamida ham kengaytirish mumkin.
Foto: “Afisha.uz”
Akkumulyator sig‘imi 5000 mA/soat bo‘lib, 25 vattli tezkor quvvatlanish funksiyasiga ega. Korpusining qalinligi 7,4 millimetrga yetadi — bu Galaxy M51’dan 21 foizga ingichka degani. Rasmiy ma’lumotlarga ko‘ra, Galaxy M52 5G’ning avtonomligi 20 soatgacha video ko‘rishga, 81 soatgacha audio eshitishga yetadi. To‘liq quvvatlangan smartfon 17 soat davomida veb-sahifalarni kuzatish imkonini beradi.
Foto: “Afisha.uz”
Hindistonda mazkur smartfonning 6/128 gigabaytli versiyasi 365 dollarga baholangan.
Avvalroq xitoylik ikki insayder Samsung kompaniyasi yaqin kunlarda 200 megapikselli mobil sensorni taqdim etishi va u 2022-yilda sotuvga chiqadigan Galaxy S22 flagmanlariga o‘rnatilishini ma’lum qilgandi.
