YouTube’да 700 мингдан ортиқ обуначиси бўлган Max Tech каналида iPhone 13 Pro Max, iPhone 12 Pro Max ҳамда iPhone 11 Pro Мах камераларининг ўзаро таққослангани намойиш этилган ролик эълон қилинди, деб хабар беради IXBT.
Ушбу ролик iPhone 11 Pro Мах ёки 12 Pro Max’и бор фойдаланувчиларга янги смартфон олиш керак ёки керакмаслиги борасида туғилган саволларига жавоб бўла олади. Видео муаллифи янги стандарт кенг бурчакли камера, ўта кенг бурчакли камера ва 3 карра яқинлаширувчи янги телеобъективни 12 Pro Max ҳамда 11 Pro Max’нинг камералари билан турли тестлар (кундузги ва тунги суратга олиш, портрет, макро ва ҳоказо) жараёнида солиштирган. Шунингдек, янги режимларга изоҳ берилган, жумладан, Cinematic Mode’га ҳам.
Бундан ташқари, Max Tech iPhone 13 Pro ва 13 Pro Max’нинг ўта кенг бурчакли камерасида макро суратга олишни автоматик ёқиш режимини ўчириб қўйишнинг оддий усулини ҳам топган. iPhone 13 Pro’нинг асосий камераси ёки телеобъективидан фойдаланишнинг энг оддий йўли — бармоқ билан ўта кенг бурчакли камерани ёпиб туриш.
Apple iPhone 13 Pro ва iPhone 13 Pro Max автоматик равишда ўта кенг бурчакли камерани ёқиш ёки ўчиришни автоматик бошқарадиган янгиланган дастурий таъминотни тақдим этишга ваъда берган. Аммо iOS 15.0.1 да бу каби тузатиш мавжуд эмас.
Аввалроқ америкалик шифокор iPhone 13 Pro Max’нинг камерасидан кўз касалликларига ташхис қўйишда фойдаланиб кўргани тўғрисида хабар берилганди.
Изоҳ (0)