Xiaomi автономлиги 8 кунга етадиган Mibro Lite «ақлли» соатини тақдим этди

Xiaomi компанияси юмалоқ экран ва техник тавсифи яхши бўлган ҳамёнбоп «ақлли» соатни тақим этди, деб хабар беради Hi-Tech.Mail.ru.

Mibro Lite номини олган соатга 1,3 дюймли АМOLED-дисплей ўрнатилган бўлиб, у диаметри 43 миллиметр бўлган корпусга жойлашади. Ҳошиялар анча ингичка, дисплей эса 2,5D шишаси билан ҳимояланган.

Соатларнинг ўзи сув ва чангдан IP68 стандарти бўйича ҳимояга эга. Бу соат 1—2 метр чуқурликдаги сувда 30 дақиқагача бардош бера олишини англатади.

Қурилма ичига сиғими 230 мА/соатга тенг аккумулятор ўрнатилган бўлиб, у соатнинг 8 кунгача ишлашини таъминлайди. «Ақлли» функцияларига келинадиган бўлса, девайсда юрак уриши частотасини ўлчаш датчиги, пульсоксиметр, 15 та спорт режими ва уйқуни кузатиш имконияти бор. Соат ҳам Android, ҳам iOS қурилмалар билан ишлай олади. Созламалари орқали рус тилини ўрнатиш мумкин.

Смарт-соатни AliExpress’дан 4,5 минг рублга (62 долларга) харид қилиш мумкин. Жамланмасидан беш хил рангдаги тасмалардан бири ҳам ўрин олади.

Аввалроқ Xiaomi камера, 4G ва кенг сиғимли аккумуляторга эга «ақлли» соатини 60 доллардан арзонроққа сотишни бошлагани тўғрисида хабар берилганди.