iPhone 14 серияси тақдим этилишига ҳали бир йилга яқин вақт бор, аммо интернетда линейканинг кейинги авлод моделлари ҳақида маълумотлар тарқалиб улгурди, деб хабар беради Hi-Tech.Mail.ru.
2021 йилда Apple iPhone 13 нинг максимал хотира сиғимини икки баробар оширди: Prо ва Pro Max моделлари ички хотираси 1 терабайтга тенг ҳолда тақдим этилди. GSMarena манбасига кўра, iPhone 14 линейкасидан 2 терабайт хотирага эга моделлар ўрин олади.
Манбада айнан қайси моделлар ҳақида гап кетаётганига ойдинлик киритилмаган, бироқ Apple ростдан ҳам 2 терабайтли хотирани таклиф этишни режалаштираётган бўлса, улар Prо версияларга ўрнатилиши мумкин. Қолган iPhone’лар хотираси эса 512 гигабайтдан 1 терабайтгача оширилади.
Тахминларга кўра, Apple ўз қурилмаларидаги хотира сиғими улар камераларнинг янги функцияларини қўллаб-қувватлаши учун оширмоқда. Чунки 2021 йилги Prо ва Pro Max моделларида ProRes форматда сониясига 30 та кадрда 4К сифатли видеони тасвирга олиш учун камида 256 гигабайт талаб этилади. 128 гигабайтли хотирага эга моделларда бу 1080p га қадар чекланган.
Аввалроқ америкалик шифокор iPhone 13 Pro Max’нинг камерасидан кўз касалликларига ташхис қўйишда фойдаланиб кўргани тўғрисида хабар берилганди.
Изоҳ (0)